Bugun, 10 noyabr kuni Hindistonning Goa shahrida shaxmat bo‘yicha shiddatli kurashlarga boy tarzda davom etayotgan jahon kubogining 4-bosqich 1-tur o‘yinlari bo‘lib o‘tadi.

Ortda qolgan 3-bosqich bahslari mamlakatimiz shaxmatchilari uchun o‘ta murakkab kechgani bilan yodda qoldi.

Mukofot jamg‘armasi 2 million AQSH dollaridan iborat jahon kubogining 3-bosqich 2-tur o‘yinlari sarhisobiga ko‘ra, afsuski birinchi raqamli shaxmatchimiz Nodirbek Abdusattorov meksikalik Xose Martines Alkantaraga 2:0 hisobida imkoniyatni boy berib qo‘ydi.

Xuddi shuningdek, ruhiy bosim ostida o‘tgan mazkur bosqich o‘yinlarida iste’dodli shaxmatchimiz Shamsiddin Vohidov hindistonlik Arjun Ergaisiga 1,5:05 ko‘rinishida yo‘l berdi.

Jahon kubogida 3-bosqichgacha yetib kelgan ishtirokchilar qatorida O‘zbekiston terma jamoasi a’zolari Abdusattorov va Vohidov 11 ming AQSH dollari miqdoridagi mukofot mablag‘ini qo‘lga kiritdi.

Hamyurtlarimizdan Javohir Sindorov 3-bosqich o‘yinlarini muvaffaqiyatli o‘tkazdi. U gretsiyalik Nikolas Teodoruni chiroyli tarzda mag‘lubiyatga uchratdi. Birinchi uchrashuvda tomonlar murosaga kelgandi. Javohir ikki o‘yin natijasiga ko‘ra, 1,5:0,5 hisobida g‘alaba qozondi va 4-tur ishtirokchisiga aylandi.

2022 yilgi shaxmat Olimpiadasi g‘olibi, uch karra O‘zbekiston chempionligiga erishgan Nodirbek Yoqubboyev 3-turda yuz foizlik natijaga erishdi.

Yoqubboyevning 3-turda vetnamlik taniqli grossmeyster Tay Van Nguenni 3:1 hisobida dog‘da qoldirgani jahon kubogidagi eng yaxshi ko‘rsatkichlardan biri sifatida qayd etildi.

Bugun o‘tkaziladigan 4-bosqich 1-tur o‘yinida Javohir Sindorov xitoylik taniqli grossmeyster Yuy Yan’i bilan, Nodirbek Yoqubboyev hindistonlik Pranav bilan kuch sinashadi.

Jahon kubogi musobaqalari 26 noyabrga qadar davom etadi.

T.Ro‘ziyev, O‘zA