Буюк Британиянинг Лондон шаҳрида шахмат бўйича жамоалар ўртасида ўтказилаётган жаҳон чемпионатининг рапид йўналишидаги беллашувлар поёнига етди.
62 та жамоа қатнашган уч кунлик муросасиз ва шиддатли “ақл жанглари”да Нодирбек Абдусатторов, Жавоҳир Синдоров, Рустам Қосимжонов, Нодирбек Ёқуббоев, Гулруҳбегим Тоҳиржонова, Нилуфар Имомқўзиева, Афруза Ҳамдамова, Шамсиддин Воҳидовдан иборат “Uzbekistan” жамоаси рапид баҳсларини муваффақиятли ўтказди.
Ҳамюртларимиз кеча рапид мусобақаларининг сўнгги учинчи кунида 2 ғалаба, 1 та дуранг ва мағлубият қайд этди. Охирги 12-турда жамоамиз чемпионатнинг энг кучли жамоаси саналган “WR Chess” билан рўбарў келди.
Машҳур шахматчиларга эга “WR Chess” жамоасига қарши қора доналарда ҳаракатланиш анча мушкул вазифа эди.
Муросасиз ўйинда Рустам Қосимжонов Ҳикару Накамура билан, Шамсиддин Воҳидов Уэсли Со билан, Гулруҳбегим Тоҳиржонова Александра Костенюк билан дурангга эришди. Нилуфар Имомқўзиева Вадим Розенштайнни мағлубиятга учратди. Шамсиддин Воҳидов Максим Вашье-Лагравга имкониятни бой бериб қўйган вазиятда Нодирбек Абдусатторовнинг Алиреза Фирузжага қарши иродали ва қатъий юриши “Uzbekistan” жамоасининг 3,5:2,5 ҳисобида ғалабага эришишини таъминлади.
Рапид йўналиши бўйича ўтган 12 та тур ўйинлари сарҳисобига кўра, Ҳиндистон шахматчиларидан иборат “MGD1” 21 очко билан 1-ўринни, Левон Аронян сардорлигидаги “Hexamind” жамоаси 20 очко билан 2-ўринни эгаллади.
Вишванатан Ананд етакчилигидаги “Freedom”, маҳоратли шахматчиларимиз жамланган “Uzbekistan” ва “WR Chess” жамоалари 17 очко билан 3-5-ўринлардан жой олишди.
Айтиш лозим, рапид йўналишидаги мусобақаларда муносиб қатнашган ҳамюртларимиз чемпионат низомига мувофиқ, 30 минг евро миқдоридаги мукофот пулини қўлга киритди.
Бугун, 14 июнь куни жаҳон чемпионатининг жамоавий блиц баҳслари бошланади. Унда жамоалар 4 та гуруҳга бўлинган ҳолда баҳсларга киришади. Ҳар бир гуруҳдан энг яхши натижага эришган 4 та жамоа плей-офф босқичига йўлланмани қўлга киритади.
“С” гуруҳидан жой олган “Uzbekistan” жамоаси 1-турда “Bye” жамоаси билан куч синашади.
Эслатиб ўтамиз, 16 июнгача давом этадиган жаҳон чемпионатининг умумий мукофот жамғармаси 500 минг евро этиб белгиланган бўлиб, 310 минг евро рапид йўналишидаги ўринлар учун тақсимланди. Энди блиц баҳслари совриндорлари 190 минг евро учун кураш олиб боришади.
Т.Рўзиев,
ЎзА