Хабарингиз бор, жорий йилнинг 14 ноябрь куни Тошкентдаги "Ҳумо Арена" мажмуасида “Lift Promotions” ва “Matchroom Boxing” ҳамкорлигида профессионал бокс оқшоми ўтказилади.
Ушбу кечанинг марказий жанги ярим ўрта вазн тоифасида WBA камари учун мажбурий даъвогар бўлиб турган ҳамюртимиз Шаҳрам Ғиёсов ҳамда россиялик Марк Урванов ўртасида бўлиб ўтади. Унда боксчилар 8 раунд давомида баҳс олиб боради.
Шунингдек, супер оғир вазнда яна бир 8 раундлик жангда Баҳодир Жалолов нигериялик Соломон Адебайо билан рақобатлашса, ушбу вазда Лазизбек Муллажонов WBC CISBB камари учун 10 раундлик жангда Моньясаҳу Муритадор билан жанг қилади.
Иккинчи ўрта вазнда WBC CISBB камари учун яна бир ҳамюртимиз Нурислом Исмоилов 10 раундлик жангда танзаниялик Жозеф Маигвисьяга қарши рингга кўтарилади.
Шунингдек, ушбу кечада турли вазнларда Шоҳжаҳон Абдуллаев, Озодбек Алиев, Аълохон Абдуллаев, Суҳроб Қаюмов, Бахтиёр Илёсов каби бир қатор боксчиларимиз навбатдаги жангларини ўтказади.
Жавоҳир Тошхўжаев,
ЎзA