“Иссиқлик электр станциялари” АЖ томонидан пойтахтимизнинг Чилонзор ва Олмазор туманларида бир вақтнинг ўзида ҳам электр ва ҳам иссиқлик энергияси ишлаб чиқариш қувватига эга замонавий когенерация қурилмаси ишга туширилган.

Айни кунларда пойтахтнинг Сергели туманидаги Ўзгариш маҳалласида ҳам ушбу қурилманинг навбатдагиси бунёд этилиб, ишга туширишдан олдинги синов-созлаш ишлари олиб борилмоқда.

“Иссиқлик электр станциялари” АЖ ахборот хизмати раҳбари Муҳаммаджон Бекмуҳаммедов бу ҳақда қуйидагиларни маълум қилди.

–Аввало, бу ишлардан кўзланган мақсад истеъмолчиларни барқарор иссиқлик ва электр энергияси билан таъминлашдир.

Мазкур инвестиция лойиҳаси Туркиянинг “Iltekno” компанияси билан ҳамкорликда амалга оширилмоқда. Ҳозирги кунда 2,3 МВт электр ва 11 Гкал иссиқлик энергияси ишлаб чиқариш қувватига эга бўлган қурилмани ўрнатиш ишлари 98 фоизга етган. 

[gallery-22617]

Лойиҳага кўра, Сергели туманидаги Ўзгариш маҳалласида Германиянинг 1 та газ-поршенли қурилмаси ҳамда 2 та “Bosch” қозонлари ўрнатилган. Мазкур энг замонавий ва энергия тежамкор бўлган ускуналар ҳисобига йилига 220 минг метр куб табиий газ тежалади ҳамда атмосферага ортиқча ташланмаларнинг ташланиши олди олинади.

Замонавий лойиҳа ишга туширилиши натижасида йилига 18,4 миллион киловатт соат электр энергияси ҳамда 46 минг Гкал иссиқлик энергияси ишлаб чиқарилади. Лойиҳа жорий йилнинг апрель ойида ишга туширилиши режалаштирилган.

Қурилма ишга тушгач, ҳудуддаги 51 та кўп қаватли уй, 1 та мактаб ва мактабгача таълим муассасаси ва 1 та ижтимоий соҳа объекти ҳамда тадбиркорлик субъектлари барқарор иссиқлик ва электр энергияси билан таъминланади.

Таъкидлаш керакки, Вазирлар Маҳкамасининг 2023 йил 20 январдаги 23-сонли қарорига асосан “Иссиқлик электр станциялари” АЖ томонидан Тошкент шаҳрининг иссиқлик таъминоти сўнгги нуқталарида жойлашган 11 та маҳаллада когенерация технологияларини жорий этиш бўйича лойиҳалар амалга оширилмоқда. Айни пайтда Чилонзор ва Олмазор туманларида ушбу қурилмалар муваффақиятли ишлаб турибди.

Насиба Зиёдуллаева, ЎзА