Коррупция – жамият тараққиётига тўсиқ бўлувчи, адолат ва ишонч тамойилларини заифлаштирувчи жиддий муаммолардан биридир.
– Коррупция – давлат бошқаруви, бизнес ва кундалик ҳаётда номутаносиблик ва ҳуқуқбузарликларга олиб келади, – деди Сенатнинг Халқаро муносабатлар, ташқи иқтисодий алоқалар, хорижий инвестициялар ва туризм масалалари қўмитаси раиси ўринбосари Одилжон Маматкаримов. – Шу боис, унга қарши курашиш нафақат давлат органларининг, балки ҳар бир фуқаронинг бурчидир.
Кейинги йилларда мамлакатимизда коррупциянинг олдини олиш ва унга қарши курашиш, давлат ва жамият қурилишининг барча соҳаларида коррупциоген омилларга чек қўйишга қаратилган кенг кўламли ислоҳотлар изчил амалга оширилмоқда.
Президентимиз Шавкат Мирзиёев Коррупцияга қарши курашиш миллий кенгаши йиғилишида коррупция ислоҳотлар йўлидаги энг катта тўсиқ ва ғов эканини алоҳида таъкидлаб ўтди ҳамда унга қарши курашиш борасида вазифаларни белгилаб берди.
Шуни таъкидлаш лозим, инвестиция соҳасида коррупцияга қарши қатъий курашиш – шаффоф ва барқарор иқтисодий муҳитни яратишнинг асосий шарти.
Коррупция инвесторларнинг ишончини сўндириб, инвестиция оқимини сусайтиради ва иқтисодий ўсишни секинлаштиради. Шу боис, инвестиция жараёнларида очиқликни таъминлаш, рақамлаштириш орқали ортиқча бюрократик тўсиқларни камайтириш ва қонун устуворлигини мустаҳкамлаш муҳим аҳамият касб этади.
Ҳар қандай сармоядор тўғри қоидалар ва кафолатланган ҳуқуқий муҳитда иш юритишни истайди. Шундай экан, биз коррупцияга барҳам бериш орқали халқаро инвесторлар учун жозибадор муҳит яратишга, тадбиркорларнинг эркин ва адолатли шароитда фаолият юритишига кўмаклашишимиз керак.
Юқорида таъкидланган масалалардан келиб чиқиб, қўмитамиз билан бирга яна бир бор ўз режа ва мақсадларимизни қайта кўриб чиқдик. Тегишли муҳим соҳалар бўйича устувор йўналишларимиз ҳамда мақсад ва вазифаларимизни белгилаб олдик.
Мухтасар қилиб айтганда, коррупцияга қарши самарали курашиш учун қонун устуворлигини таъминлаш, шаффофликни ошириш ва жамиятда ҳуқуқий маданиятни шакллантириш талаб этилади.
Коррупцияга қарши курашишда ҳамжиҳат бўлиб, қонунларга риоя этиш, манфаатлар тўқнашувига йўл қўймаслик, ва, айниқса, ёш авлодни ҳалол тарбиялашимиз лозим.
Н.Абдураимова, ЎзА