Ватан учун, миллат учун, халқ учун! Мана шу эзгу ғоя остида ўтказилаётган Ватанимиз мустақиллигининг 34 йиллигига бағишланган байрам тантаналарида юртдошларимиз кайфиятида нафақат хурсандчилик, балки эртанги кунга, келажакка бўлган ишонч кўзга яққол ташланмоқда.

Давлат мустақиллигининг 34 йиллиги муносабати билан Президентимизнинг тегишли фармонига асосан турли соҳаларда самарали меҳнати, мамлакат тараққиётига қўшган катта ҳиссаси учун тақдирланган юртдошларимизга фахрий унвонлар, орден ва медалларни топшириш маросимлари ҳам ўзгача байрам тусини олмоқда. Зеро, нуфузли мукофотга лойиқ кўрилган инсонлар шу Ватан, миллат, халқ учун фодойилик билан меҳнат қилган.  

[gallery-25035]

Олий Мажлис Сенатида ҳам бир гуруҳ юртдошларимизга давлат мукофотларини топшириш тантанали маросими ўзгача шукуҳ ва юқори даражада ташкил этилди. 

Сенат Раиси Танзила Норбоева ҳамда Қонунчилик палатаси Спикери Нуриддин Исмоилов Ўзбекистон Республикаси Президенти номидан тақдирланганларга давлат мукофотларини ва тегишли ҳужжатларни топширди.

Сўзга чиққанлар таъкидлаганидек, мустақиллик йилларида амалга оширилган ислоҳотлар, янгиланиш ва бунёдкорлик жараёнлари натижасида халқимиз фаровонлиги ошиб, юрт равнақи тобора юксалиб бормоқда. Бугунги кунда барча соҳалардаги ютуқлар халқимизнинг фаровон ҳаётида ўз ифодасини топмоқда.

Мукофотланганлар давлатимиз раҳбарининг юксак эътибори ва ишончи учун чуқур миннатдорлигини, шунингдек, янги Ўзбекистон тараққиёти йўлида янада фаоллик билан меҳнат қилишга тайёр эканини билдирди.

<iframe width="640" height="480" src="https://www.youtube.com/embed/X8NUevTRq28?si=k0zQrwMWlYqWOmp_" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Н.Абдураимова,

Н.Ҳайдаров (сурат),

Н.Абдувоитов (видео), 

ЎзА