Хитой Қўшма Штатлар тариф урушида ягона куч эмаслигини исботламоқда.

Президент Дональд Трамп АҚШ ва ХХР ўртасида янги савдо можароси бошланишидан анча олдин, Пекин Вашингтоннинг асосий қишлоқ хўжалиги ва энергия экспортини қамал қилиш бўйича яширин кампанияни такомиллаштириш устида иш бошлаган экан.

– Чин мамлакати сўнгги тўрт ой ичида бир неча бюрократик тўсиқ қўйиб, учинчи томон билан савдо битими тузиш орқали Америкадан мол ва парранда гўшти ҳамда суюлтирилган газнинг тўғридан-тўғри импортини тўхтатган ёки сезиларли даражада камайтирган, – деб ёзди “Politico” нашри. – Хитой америкалик экспортчиларни қаерда қаттиқ “чимчилаш” мумкинлигини билади. Пекин аллақачон юзлаб гўшт қадоқлаш заводлари учун экспорт лицензиясини янгилашдан бош тортган ва АҚШ табиий гази импортини тўхтатган. Бу икки қудратли давлат ўртасидаги савдо зиддияти кучайишига ғайри оддий усул билан жавоб берилиши, шу билан бирга йиллар давомида янги савдо урушига тайёргарлик кўриш имконияти мавжудлигига ишорадир.

– Сўнгги савдо уруши бошланиши билан Хитой Вашингтон билан муносабат янада ёмонлашиши мумкинлигини ўйлаб, қўшимча куч, воситалар тайёрлашга киришган, – дейди Стратегик ва халқаро тадқиқотлар маркази энергия хавфсизлиги бўйича таҳлилчиси Палти-Гузман. – Ҳозир кутилган вазият келгандек. Қўшма Штатлар мол гўштининг соф импортчиси, ХХР тегишли маҳсулотларнинг асосий харидори бўлса-да, Хитой эски лицензияларни янгилашдан воз кечиб, АҚШдан мол гўшти экспортини 90 фоиз камайтирди.

Пекин томонидан қабул қилинган океан ортига муҳим минераллар экспортини чеклаш қарори Американинг тоза энергия ва нефть-кимё ишлаб чиқарувчиларига таъсир қилди. Натижада электр автомобили аккумуляторидан тортиб, сайр идишлари учун ишлатиладиган елимгача бўлган турли товарларни тайёрлаш жараёни кескин қийинлашди. Чин юрти айни фойдали қазилмаларга энг бой замин ҳисобланади.

Мусулмон Зиё, ЎзА