Саудия Арабистони Энергетика вазири шаҳзода Абдулазиз бин Салмон Подшоҳликнинг Шарқий вилояти ва Руб ал-Хали чўлида ўн тўртта янги нефть ва газ кони очилганини маълум қилди.

Мамлакатнинг етакчи “SPA” ахборот агентлиги вазир сўзларидан қуйидаги иқтибосни келтирган:

– “Saudi Aramco” миллий нефть компанияси олтита янги кон ва мавжуд конлардаги икки ўчоқни, шунингдек икки янги газ кони ва тўрт янги ўчоқни аниқлади.

Мулозимнинг сўзларига кўра, ушбу кашфиёт мамлакат бой углеводород ресурсларига эгалигини тасдиқлайди, иқтисодий тараққиёт учун янги уфқлар очади, келгуси ўн йилликлар давомида маҳаллий ва глобал энергия талабини самарали, барқарор қондириш қобилиятини қўллаб-қувватлайди.