Санкт-Петербургда уйсизлар музейи очилди
Бу музейга фақат экскурсия гуруҳлари таркибида ташриф буюриш мумкин, деб ёзмоқда рус нашрлари.
Чипталарни сотишдан тушган маблағлар оғир ҳаёт шароитида қолган одамларни қўллаб-қувватлашга йўналтирилади.
Музей кўргазмаси турли тарихий даврларни - антик даврдан то XX аср охиригача бўлган вақтни ўз ичига олган уйсиз кишиларнинг ҳикояларини намоён этади.
Aсосий экспонатлардан ташқари музей залларида моддий ва номоддий қадриятларни ўзида мужассам этган объектлар ҳам намойиш этилади. Экспонатларни тўплашга бир йилдан ортиқ вақт кетганлиги айтилмоқда.
Музейда шунингдек, фильмлар намойиши, фотосуратлар кўргазмалари ва мавзули маърузалар каби маърифий тадбирлар ўтказилади. Қолаверса, уйсизлик қийинчиликларини енгиб, янги ҳаёт бошлашга муваффақ бўлган инсонлар билан учрашувлар ташкил этиш ҳам режалаштирилган.
Г.Сатторова, ЎзА