Ушбу ҳафтада дунё нигоҳи яна Самарқандга қаратилади. Шарқ дарвозаси бўлган қадимий кентда “Марказий Осиё – Европа Иттифоқи” биринчи саммити ва Иқлим форуми ўтказилади.

Айни пайтда шаҳарда мазкур анжуманларга қизғин ҳозирлик кўрилмоқда. Шаҳар кўчалари Марказий Осиё давлатлари ва Европа Иттифоқи байроқлари ҳамда форум рамзлари билан безатилган.

Форумда Ўзбекистон, Қозоғистон, Қирғизистон, Тожикистон ва Туркманистон Республикалари раҳбарлари, шунингдек, Европа Иттифоқи, БМТ, халқаро молия институтлари ва етакчи экология ташкилотлари вакиллари, 80 дан ортиқ давлат делегацияалири иштирок этиши кутилмоқда. Бу ҳудуднинг яшил трансформацияси ва барқарор ривожланишига умумий садоқатни тасдиқлайди.

Таъкидлаш лозимки, БМТ Бош Ассамблеяси Ўзбекистон ташаббуси билан қабул қилинган “Марказий Осиё экологик муаммолар олдида: барқарор ривожланиш ва фаровонлик йўлида минтақавий бирдамликни мустаҳкамлаш” резолюциясини бир овоздан қабул қилган. Унда Ўзбекистон Президентининг қатор ташаббуслари, жумладан, Марказий Осиё учун яшил кун тартиби ва унинг минтақада барқарор ривожланишга кўмаклашишдаги роли алоҳида қайд этилган ҳамда Самарқандда Халқаро иқлим форумини ўтказиш ташаббуси қўллаб-қувватланган.

“Марказий Осиё глобал иқлим муаммоларига дуч келмоқда: умумий фаровонлик учун бирлашиш” мавзуси остидаги форум экологик барқарорлик, яшил иқтисодий ривожланиш ва иқлим барқарорлиги бўйича мулоқотни илгари суриш учун юқори даражадаги платформага айланади. Асосий эътибор минтақавий ва халқаро ҳамкорликка қаратилган. Иқлим форуми қайта тикланадиган энергетикани ривожлантириш, сув ресурсларини комплекс бошқариш, биологик хилма-хилликни сақлаш ва барқарор шаҳар тараққиёти каби асосий йўналишлар бўйича эксперт панеллари, ялпи сессиялар ва сиёсий мулоқотларни таклиф қилади.

Муҳокаманинг асосий мавзуларидан бири глобал миқёсдаги экологик ҳалокатнинг яққол намунаси бўлган Орол денгизи инқирозидир. Мутахассислар ва ҳукумат вакиллари зарар кўрган ҳудудларда ерларни тиклаш, чўлланишга қарши курашиш ва иқлим ўзгаришининг ижтимоий-иқтисодий оқибатларини камайтириш бўйича барча ечимларни кўриб чиқадилар.

  Тадбир якунлари бўйича Самарқанд форумининг якуний ҳужжати – “Яшил” ривожланишнинг минтақавий концепцияси тақдимоти режалаштирилган бўлиб, у иқлим ўзгариши соҳасида Марказий Осиё давлатларининг ягона минтақавий қарашларини шакллантиришга асос солади. Унда етакчи халқаро ташкилотларнинг минтақадаги экологик муаммоларни ҳал қилиш борасидаги ёндашувлари баён қилинади.

[gallery-22605]

Халқаро тадбирларнинг юқори савияда ўтказилиши ҳамда хавфсизликни таъминлаш мақсадида Самарқандда транспорт воситалари ҳаракатланиши қисқартирилиши ва чекланиши муносабати билан 1–5 апрель кунлари Самарқанд шаҳридаги еттита олий ўқув юрти ҳамда тўртта академик лицей ва техникумда қисқа муддатли таътил эълон қилинди. Бу муассасаларда ўқув жараёнлари 2025 йил 7 апрель, душанба кунидан бошланади. Шунингдек, 3, 4 ва 5 апрель кунлари вилоят ҳудудидан транзит ўтувчи транспорт воситалари учун айланма ҳаракат ташкил этилади.

 Ғ.Ҳасанов, А.Исроилов (сурат), ЎзА мухбирлари