АҚШ президенти Дональд Трамп Украинада ўт очишни тўхтатишга эришиш учун ажратилган вақтни қисқартириш ниятида.

– Мен бу 50 кунни янада қисқартирмоқчиман, чунки жавоб қандай бўлишини жуда яхши биламан, -деди у Шотландияда Британия бош вазири Стармер билан учрашуви олдидан журналистларга.

Маълумки, жорий йилнинг 14 июль куни Қўшма Штатлар етакчиси Москвага Киев билан тинчлик келишувини талаб қилиб, 50 кунлик вақт белгилаган эди. Шартлар бажарилмаса, у нефть, газ ва бошқа энергия ресурсларини сотиб олувчи мамлакатларга иккиламчи божлар билан бир қаторда, Россия товарлари импортига 100 фоизлик тарифлар жорий этиш билан таҳдид қилганди.

Шу билан бирга, Трамп АҚШ ва ЕИ Киевга Америка қуролларини жўнатишга келишиб олганини, бунинг учун харажатлар Европага тўғри келганини айтди. Келгуси етказиб беришлар нафақат ракеталарни, балки “Patriot” ҳаво мудофаа тизимларини ҳам ўз ичига олади.

Россия президентининг матбуот котиби Дмитрий Песков ушбу баёнотга муносабат билдириб,бу масала жиддийлигини, уни таҳлил қилиш учун Москвага вақт кераклигини айтган. Унинг сўзларига кўра, Владимир Путин агар зарур деб билса, Трампнинг сўзларига албатта изоҳ беради.

С.Раҳимов, ЎзА