“Солиқчи – тадбиркорга кўмакчи” тамойилининг ижроси бўйича Бухоро вилояти Ромитан туманида фаолият кўрсатмаётган иқтисодий танг аҳволга тушиб қолган 207 та корхонанинг 100 га яқини давлат солиқ органлари ходимларининг кўмаги билан қайта тикланмоқда.
Янгидан фаолият бошлаётган 10 та тадбиркорлик субъектларига бизнесда фаолиятларини бошлашлари учун дастлабки пул маблағларини кредит асосида олиб беришларида кўмаклашилди.
Туманда иссиқхона фаолиятини йўлга қўйган тадбиркорлар талайгина. 3 гектар майдонда замонавий чет-эл андозаси асосида иссиқхона барпо қилган “Ҳамро Саид” масъулияти чекланган жамиятида айни кунларда тайёр маҳсулотни чет давлатларга экспорт қилишга тайёргарлик кўрилмоқда.
Ушбу корхонага жорий йил бошида туман давлат солиқ хизмати аралашуви билан 3 ярим миллиард сўм кредит маблағлари олиб берилган эди. Пировардида тадбиркор иссиқхона фаолиятини бошлаб юборди. Айни пайтда эса 15 нафарга яқин “Ёшлар” ҳамда “Аёллар” дафтарларига киритилган фуқаролар меҳнат қилишмоқда.
Туманнинг “Қоқиштивон” МФЙда истиқомат қилувчи Асилбек Равшанов тадбиркорлик фаолиятини яқинда бошлаган ёш тадбиркорлардан бири.
-Шу пайтгача қўлимда сармоям йўқлиги сабаб, балиқчилик йўналишидаги бизнес ғоямни амалга ошириш армон бўлиб келаётганди, -дейди Асилбек Равшанов. -Буни қарангки, туман давлат солиқ инспекцияси масъул ходимларининг ўзлари ишсиз фуқаролар сингари менга ҳам коллектор зовурда балиқчилик бизнесини таклиф қилиб қолишди. Бундан хурсанд бўлдим. Шундан сўнг менга 4-сектор ҳудудидан ўтган коллектордан бир гектарга яқин масофа ажратиб берилди. Балиқ чавоқлари ташланишигача кўмаклашилди.
Бугун ушбу ёш тадбиркорнинг шашти анча баланд. Унинг айтишича, яқин кунларда у ушбу масканда яна бошқа бизнес ғояларини амалга оширмоқчи.
Вилоят ДСБ Матбуот хизматидан олинган хабарга кўра, Ромитан тумани давлат солиқ инспекцияси масъул ходимлари 2021 йилнинг ўтган даврида жами 520 дан зиёд тадбиркорлик субъектининг турли муаммоларини ҳал этишда амалий кўмак беришган. Шундан, дастлабки бухгалтериясини юритиш бўйича 131 та корхонага ёрдам берилди. Солиқ имтиёзлари ва уларни қўллаш тартибини тушунтириш борасида эса 63 та корхонага тегишли амалий кўмак кўрсатилди. 5 га яқин корхонага кредитлар ажратилишига кўмаклашилди.
Кўрсатилаётган хизматлар ҳар жиҳатдан самарали бўлмоқда. Асосийси, тадбиркорлик субъектларига кўрсатилаётган амалий кўмаклар натижасида бюджет тушумларининг ўз вақтида келиб тушиши ҳамда қўшимча ишчи ўринлари яратилишига эришилмоқда.
Зариф Комилов, ЎзА