Ўзбекистоннинг расмий захиралари 2025 йил октябрь ойи ҳолатига кўра рекорд даражага етди — уларнинг умумий ҳажми 59,33 миллиард долларни ташкил этди.

Бу ҳақда Ўзбекистон Республикаси Марказий банкининг расмий сайтида маълум қилинди.

Қайд этилишича, захиралар ҳажмининг бундай ўсишига асосий омил сифатида олтин нархининг ошиши ҳамда мамлакат захираларининг кўпайиши кўрсатилмоқда.

Марказий банк маълумотларига кўра, олтин захиралари 47,85 миллиард доллар, валюта захиралари эса 10,91 миллиард долларни ташкил этган.

Шу тариқа, жорий ой давомида захиралар миқдори 4,3 миллиард долларга ошган. Олтн нархининг ўсиши мамлакат захираларига қўшимча 2,5 миллиард доллар қиймат қўшган.

Марказий банк таъкидлашича, захиралар ҳажмининг бундай ўсиши мамлакатнинг молиявий барқарорлиги ва ташқи иқтисодий хавфсизлигини таъминлашда муҳим аҳамият касб этади.

Ш. Маматуропова, ЎзА