Мамлакатимизда ўқувчи-қизларни замонавий ахборот технологияларига жалб этиш масаласига катта эътибор қаратилмоқда. Мактабгача ва мактаб таълими вазирлиги ҳамда “Digital Generation Uzbekistan” нодавлат нотижорат таълим маскани билан ҳамкорликда ташкил этилаётган “Рақамли авлод қизлари-2025” лойиҳаси кўпчилик қизларда, уларнинг ота-оналарида катта қизиқиш уйғотмоқда.

Мазкур лойиҳа ҳақида кузатувчилардан кўплаб саволлар келиб тушмоқда. Хусусан, “Рақамли авлод қизлари-2025” да Start-up лойиҳалар қайси йўналишларда қабул қилинади?

Айтиш керакки, мазкур лойиҳада иштирокчилар томонидан 4 та йўналишдаги Start-upлар тақдим қилинади. Булар таълим, сунъий интеллект, яшил иқтисодиёт, иқлим ўзгариши каби йўналишлардир.

“Рақамли авлод қизлари-2025” лойиҳасида иштирок этиш учун ёш чегараси 30 ёшгача деб белгиланган.

Лойиҳада иштирок этиш учун бир жамоа таркибида фақат 2 та иштирокчи қатнашиши мумкин. Шунингдек, лойиҳада якка тартибда иштирок этишга ҳам рухсат берилган.

Айтиш керакки, лойиҳанинг бу йилги мавсуми 24-29 апрель кунлари бўлиб ўтади. Айни вақтда qizlar.raqamliavlod.uz платформаси орқали рўйхатдан ўтиш жараёнлари давом этмоқда.

Н.Усмонова, ЎзА