Кўп миллатли Ўзбекистон заминида, шу жумладан, Наманган вилоятининг олис ва чекка маҳаллаларида этник аҳоли билан бир қаторда шу муқаддас диёрни ўз Ватани сифатида эъзозлаётган қирғиз, тожик, татар, рус, корейс каби миллатлар вакиллари муқаддас Рамазон Ҳайитини “Дўстлик ва ҳамжиҳатлик улуғланган юрт”, “Ватан ягонадир, Ватан биттадир!”, “Қудратимиз – бирлик ва ҳамжиҳатликда!”, “Қўшничилик – минг йилчилик!”, “Ҳайит байрами – эзгулик, шукроналик ва меҳр-оқибат байрами” шиорлари остида катта тантаналар билан баҳорий хушкайфиятда нишонланмоқда.

Байрам фестивалида Наманган вилоят ҳокими, Ўзбекистон Республикаси Олий Мажлиси Сенати аъзоси Шавкат Абдураззоқов иштирок этиб барчани байрамлар билан самимий қутлади.

Янгиқўрғон туманидаги пурвиқор тоғ адирликларга ястанган Нов маҳалласи қўшни Қирғиз Республикаси билан чегарадош бўлиб, унда асосан қирғиз миллатига мансуб аҳоли истиқомат қилади. Маҳалла аҳли тоғларга туташ кенгликларда миллатлараро тотувликнинг ёрқин ифодаси сифатида  чинакамига сайл қилишди.

[gallery-22590]

Байрам тадбирларида дўстлик ва бирдамлик, бағрикенгликни улуғловчи шеърий чиқишлар ва турли маданий кўнгилочар томошалар уюштирилди. Вилоят мусиқали драма театри, туман маданият бўлими томонидан концерт дастури, амалий санъат ва ҳунармандчилик буюмлари кўргазмалари ташкил этилди.

Миллий ўйинлар – “Оқ теракми – кўк терак”, “Куч синаш”, “Арқон тортиш”, “Чиллак”, “Варраклар сайли”  ва турли спорт мусобақалари барчага завқ улашди. Ёшлар ўртасида дўстлик ва ҳамжиҳатлик, тинчликни мустаҳкамлашга қаратилган расмлар танловида фаоллик кўзга ташланди. “Меҳр-оқибат дастурхони” шиори остидаги тадбирда турли миллатларнинг миллий таомлари кўргазмаси ҳавола қилинди. “Наврўз учун 10 000 табассум” хайрия акцияси доирасида етим болалар, ногиронлиги бор инсонлар ва ижтимоий дафтарларга киритилган эҳтиёжманд оилаларга совғалар тақдим этилди.

Айниқса, Наманган вилоятидаги ўзбек, қирғиз, тожик, рус, корейс миллий маданий марказлари томонидан фольклор-этнографик ансамблларнинг бадиий чиқишлари, рақс ва ашула, миллий мақом, халқ оғзаки ижодиёти асарлари, лапарлар, айтишувлар иштирокчилар томонидан кўтаринкиликда қарши олинди. Ўзбекистон ва қўшни давлатларда етишиб чиққан буюк алломалар сиймоси гавдалантирилган саҳна кўринишлари эса олқишланди. “Либосларда жилоланган қадрият” шиори остидаги турфа элатларнинг миллий либослари намойиш қилинди. 

Эслатиб ўтамиз, дўстлик, бағрикенглик, бирдамлик, меҳр, оқибат тантаналари вилоятдаги 133 маҳаллада қизғин ва кўтаринкилик билан давом этмоқда.

Оқилхон Дадабоев, ЎзА