Жиззах вилоятининг шаҳар ва туманларидаги маҳаллаларда ҳам миллатлараро дўстлик ва ҳамжиҳатликни янада мустаҳкамлашга бағишланган байрам тадбирлари ўтказилди.

Дўстлик туманидаги Манас маҳалласида асосан қирғиз миллатига мансуб фуқаролар истиқомат қилади. Маҳалла аҳолиси жуда иноқ. Бу ерда ўзбек, тожик ва қирғиз миллатига мансуб фуқаролар аҳилликда бир оила бўлиб яшашади.  Маҳаллада “Қудратимиз – бирлик ва аҳилликда” шиори остида ташкил этилган байрам тадбирида аҳолининг ўзаро ҳамжиҳатлиги, бирдамлиги яна бир бор намоён бўлди.

Ўзбек, қирғиз, тожик, қозоқ, татар, рус, украин ва бошқа миллатларнинг бирдамлигини  янада мустаҳкамлаш, турли тилларда сўзлашувчи ягона халқ вакилларини бирлаштириш ҳамда дўстлик ришталарини мустаҳкамлашга қаратилган тадбирда маҳалланинг нуроний оқсоқоллари, ёшлар, маҳалла фаоллари ҳамда меҳмонлар иштирок этди. 

Дўстлик тумани ҳокими Шавкат Дарвешев  тадбир иштирокчиларини ўзбек, қирғиз, тожик, қозоқ ва рус тилларида табриклади. Дўстлик ва ҳамжиҳатликнинг аҳамияти, миллатлараро тотувлик ва бир-бирини ҳурмат қилиш жамият тараққиётининг муҳим омилларидан бири эканлиги алоҳида таъкидланди.

Кўп миллатли Дўстлик туманида миллатлар ўртасидаги ўзаро ҳамжиҳатлик, бирдамлик ва дўстликни мустаҳкамлашга, маҳаллий аҳоли орасида миллий қадриятларни улуғлашга ўзларининг муносиб ҳиссасини қўшган бир гуруҳ турли миллат вакиллари фахрий ёрлиқ ва қимматбаҳо совғалар билан тақдирланди. Байрам тадбири доирасида 3 нафар ўзбек, қирғиз ва тожик миллатига мансуб эҳтиёжманд оилалар фарзандларининг суннат тўйи ҳам ўтказилди.

–Ўзбекистон кўплаб миллат вакиллари аҳил-иноқ бўлиб яшаётган жаннатмакон юртдир, – дейди Жиззах вилоятидаги Қирғиз миллий маданий маркази раиси ўринбосари Тўйчи Исмоилов. – Ўзбек, қирғиз, тожик дўстлигига келсак, улар неча минг йилликлардан буён қўни-қўшни бўлиб, дўстона ҳаёт кечириб келган. Уларнинг дини бир, дили бир, тўю маъракаси бир. 

Манас маҳалласида “Яшил макон” умуммиллий ҳаракати доирасида Дўстлик боғи ташкил этилди. Бу ерда турли миллат вакиллари  томонидан 500 тупга яқин мевали ва манзарали дарахт кўчатлари ўтқазилди. 

Турли миллат вакилларининг миллий рақслари, фольклор жамоаларнинг чиқишлари, куй-қўшиқлар тадбирга ўзгача файз бағишлади. 

Шу куннинг ўзида, Зомин тумани Дуоба, Фориш туманидаги Дўстлик, Янгиобод туманидаги Сармич, Бахмал туманидаги Музбел ва 20 дан ортиқ маҳаллаларда миллатлараро тотувлик ва дўстлик байрами кенг нишонланди.

Дуобадаги “Дўстлик ва ҳамжиҳатлик улуғланган юрт” шиори остида ташкил этилган байрам тадбири катта сайилга айланди. Байрам тадбирида Жиззах вилояти ҳокими вазифасини бажарувчи Улуғбек Мустафоев иштирок этди.  Вилоят раҳбари иштирокчиларни самимий табриклаб, мамлакатимизда миллатлараро тотувлик ва ҳамжиҳатликни мустаҳкамлаш давлат сиёсатининг устувор йўналишларидан бири эканини таъкидлади.

 Шунингдек, тадбир давомида ҳунармандчилик ва миллий таомлар кўргазмаси ташкил этилиб, меҳмонларга халқимизнинг бой маданий мероси намойиш қилинди. Миллий спорт мусобақалари, байрамона концерт дастурлари ва турли танловлар ҳам иштирокчиларга кўтаринки кайфият улашди.

Фориш тумани “Дўстлик” маҳалласида “Миллатлараро тотувлик, бағрикенглик ва ҳамжиҳатлик” мавзусида ташкил этилган байрам тадбири “Саломатлик учун 5000 қадам” юриш марофони билан бошланди. Бу ерда ҳам турли маданий дастурлар намойиш этилди. Иштирокчилар томонидан ўзаро ҳурмат ва меҳр-оқибат муҳити ҳамда миллатлараро тотувликни янада мустаҳкамлашга қаратилган ташаббуслар илгари сурилди.

– Қўшни қардош давлатлар билан чегаралар деярли ёпиқ эди, – дейди тожик миллатига мансуб, меҳнат фахрийси Очил Яробеков. – Шундоққина чегаранинг у томонида бўлган жон-жигарини бориб кўриб келиш учун ўнлаб ҳужжатларни тўғрилаш, ҳатто, пиёда бориш мумкин бўлган қишлоққа юзлаб,  минглаб километр йўл босиб, минг азоб-уқубат билан  ўтишга тўғри келар эди. Яратганга беҳисоб шукурлар бўлсин, бугун дориломон кунлар келди. Ўзбек – қирғиз билан, қирғиз – тожик билан, тожик – ўзбек билан туғишган ака-ука, опа-сингил, қуда-анда, қадрдон бўлиб ришталар янада мустаҳкам боғланди. Бугун  туманимизда ўзбекнинг тўйи тожиксиз ўтмайди, тожикнинг маъракасида қирғиз хизматда, қирғизнинг яхши кунида ўзбек давранинг тўрида. Уларнинг яхши ёмон куни, тўю тантанаси, жанозаси бир-бирисиз ўтмайди. Бу эса давлатимиз раҳбари томонидан олиб борилаётган оқилона ва халқпарвар сиёсатнинг амалдаги самарасидир.

Тадбирларда амалий санъат ва ҳунармандчилик буюмлари кўргазмалари ташкил этилди. “Жонли устахона” форматида гиламдўзлик, заргарлик, кулолчилик ва ёғоч ўймакорлиги каби ҳунармандчилик йўналишлари намойиш қилиниб, меҳмонларга ўз қўллари билан миллий безаклар тайёрлаш имконияти яратилди. 

 Миллий халқ ўйинлари — оқ теракми – кўк терак, елкада кураш, арқон тортиш, чиллак, юрт полвонлари мусобақалари ўтказилди. Болажонлар ўртасида ўтказилган “Варраклар сайли” кўпчиликка кўтаринки руҳ бағишлади. 

“Адабий кўприк” композицияси доирасида қўшни давлатларнинг буюк аждодлари адабий меросини акс эттирувчи китоблар кўргазмаси ўтказилди. Ёшлар ўртасида дўстлик ва ҳамжиҳатликни, тинчликни мустаҳкамлашга қаратилган расмлар танлови ташкил этилди. “Меҳр-оқибат дастурхони” шиори остида турли миллатларнинг миллий таомлари кўргазмаси намойиш этилди. Буюк аждодларимиз ҳамда қўшни давлатларнинг мутафаккирлари, ёзувчи ва шоирларининг дўстлик ва ҳамжиҳатликни мадҳ этувчи  асарлари бўйича китобхонлик танловлари ўтказилди. 

“Наврўз учун 10 минг табассум” хайрия акцияси доирасида етим болалар, ногиронлиги бўлган инсонлар ва кам таъминланган оилаларга совға-саломлар топширилди. Театр вакиллари томонидан Ўзбекистон ва қўшни давлатларда етишиб чиққан буюк алломалар сиймоси гавдалантирилган саҳна кўринишлари намойиш этилди. 

[gallery-22601]

“Ҳайит оши – тинчлик, дўстлик ва бағрикенглик оши!” шиори остида маҳалла аҳолиси учун эҳсон тадбирлари ташкил этилди. Уйидан чиқа олмайдиган беморлар ва кекса авлод вакилларининг ҳолидан хабар олинди. 

Тадбирлар доирасида барча маҳаллалар ҳудудида турли миллат вакиллари иштирокида “Дўстлик боғлари” барпо этилди. 

А.ҚАЮМОВ,

 Ж.ЁРБЕКОВ (сурат), ЎзА