Қорақалпоғистон Республикаси прокуратура органлари томонидан Президентимизнинг “2025 йилда республика маҳаллаларида хавфсиз муҳитни яратиш ва ҳуқуқбузарликларнинг барвақт олдини олиш тизими самарадорлигини янада ошириш чора-тадбирлари тўғрисида”ги қарори ижроси юзасидан тасдиқланган “Йўл харита”ларида белгиланган вазифаларнинг ижроси бўйича ишлар самарали олиб борилмоқда.
Жумладан, барча ҳудудий прокурорлари шаҳар ва туман Ички ишлар бўлимлари билан бирга пробация гуруҳи назорати остида жазо муддатини ўтаётган ҳамда профилактика ҳисобига олинган шахслар билан ҳудудларга чиққан ҳолда учрашди. Муаммоси мавжуд 120 нафар шахс прокурорларнинг шахсий қабулида бўлиб, уларнинг юзга яқин мурожаати ҳал қилишлик учун назоратга олинди. Қабулда 8 та мурожаат жойида ижобий ҳал этилган бўлса, 12 та мурожаат юзасидан ҳуқуқий тушунтириш берилди.
Шунингдек, тадбир доирасида ташкил этилган меҳнат ярмаркаларида йигирмага яқин шахс доимий ишга жойлаштирилган бўлса, беш нафар шахсга тадбиркорлик фаолиятини йўлга қўйишга кўмаклашиладиган бўлди. Тадбирда иштирок этган тиббиёт ходимлари томонидан соғлиғидан шикоят қилган шахсларни чуқурлаштирилган тиббий кўрикдан ўтишлари ва даволанишларига йўлланма берилди.
***
ЎзЛиДеП Қораўзак тумани Кенгаши томонидан ташкил этилган “Депутатлар ва тадбиркорлар билан мулоқот” форумида маҳаллий Кенгаш депутатлари, Ўзбекистон Савдо-саноат палатаси туман бўлими, тижорат банклари, тадбиркорлар ва оммавий ахборот воситалари вакиллари иштирок этди.
Тадбирда кичик бизнес ва хусусий тадбиркорликнинг ривожланишига тўсиқ ва эркинлигини чеклаётган бир қатор муаммоларни мунтазам равишда тизимли ўрганиб бориш ва уларни бартараф этиш, шунингдек, аҳоли бандлиги ва даромадини оширишнинг асосий манбаи бўлган кичик бизнес ва хусусий тадбиркорликни янада ривожлантириш бўйича жойларда тўпланиб қолган муаммоларни ўрганиб, уларни жойида ҳал этиш чораларини кўриш бўйича масалалар муҳокама қилинди.
Форум давомида тадбиркорликни энди бошламоқчи бўлган хотин-қизлар ва ёшлар, тадбиркорлик субъекти вакиллари ўз фикр ва таклифларини билдириб ўтди.
***
Халқ депутатлари Беруний туман Кенгаши депутати Ерлан Суюнишев ташаббуси билан кам таъминланган ва шароити оғир оилаларга хайрия ёрдами кўрсатилмоқда.
Жорий йилнинг 31 март куни муборак Рамазон ҳайити муносабати билан тумандаги Пахтакор, Бирлик, Наврўз ҳамда Истиқлол маҳаллаларида яшовчи ижтимоий кўмакка муҳтож оилалардан хабар олиниб, уларга озиқ-овқат маҳсулотлари тарқатилди.
Довуд Абибуллаев, ЎзА мухбири.