Янги қонунлар Бош қомус, миллий қонунчилик, халқаро ҳуқуқнинг умумэътироф этилган принцип ва нормаларига мос бўлиши керак.

Айниқса, қонун лойиҳаларини ишлаб чиқиш ва қабул қилишда аҳоли ва кенг жамоатчилик билдирган фикрлар ва позицияларни ўрганиш ҳамда уларни инобатга олиш жамият ва давлат ҳаётига оид стратегик қарорлар қабул қилишда ўта муҳим аҳамият касб этади.

Сенат ялпи мажлисида муҳокама қилинган “Қонунлар лойиҳаларини Ўзбекистон Республикаси Олий Мажлисининг Қонунчилик палатасига киритиш ва кўриб чиқиш тартиби такомиллаштирилиши муносабати билан Ўзбекистон Республикасининг айрим қонун ҳужжатларига қўшимча ва ўзгартиришлар киритиш тўғрисида”ги қонун соҳага оид жараённи такомиллаштиришга қаратилган. 

Қонун билан қонун лойиҳасини парламентга киритишда қонун лойиҳасининг ва халқаро шартнома лойиҳаси (матни)нинг ҳуқуқий экспертизаси натижалари, шунингдек, қонун лойиҳасининг коррупцияга қарши экспертизаси ва у бўйича ўтказилган жамоатчилик муҳокамаси натижаларини тақдим этиш масалалари белгиланмоқда.

Бундан ташқари, қонун лойиҳасини киритган қонунчилик ташаббуси ҳуқуқи субъекти ўзи киритган қонун лойиҳасини Қонунчилик палатаси томонидан иккинчи ўқишда қабул қилингунига қадар чақириб олиш тўғрисидаги норма мустаҳкамланмоқда.

Сенаторлар маъқуллаган ҳужжат қонунчилик ташаббуси ҳуқуқига эга бўлган субъектларнинг қонун ижодкорлиги соҳасидаги фаолияти сифатини ошириш, қонунларнинг ижтимоий муносабатларни тартибга солишдаги ролини мустаҳкамлаш, халқчил ҳамда тўғридан - тўғри ишлайдиган қонунлар қабул қилинишига хизмат қилади. 

Н.Абдураимова, ЎзА