ФОТОРЕПОРТАЖ

Жануби-ғарбий махсус ҳарбий округига қарашли “Термиз” умумқўшин дала-ўқув майдонида Сурхондарё вилоятидаги умумтаълим мактабларининг 10-11 синф ўқувчилари жанговар қуролдан ўқ отиш машқларини бажарди.

Дастлаб Жануби-ғарбий махсус ҳарбий округ қўшинлари қўмондони, генерал-майор Фарҳод Шерматов ёшлар билан учрашиб, миллий армия мардлик ва шон-шараф мактабига айланаётгани, шунингдек, ўсиб келаётган авлодни ҳарбий-ватанпарварлик руҳида тарбиялаш, уларни ижтимоий қўллаб-қувватлаш борасидаги кенг кўламли ишлар ҳақида сўз юритди.  

Чақириққа қадар бошланғич тайёргарлик фанидан олган назарий билимларини мустаҳкамлаш мақсадида дала–ўқув майдонига келган 500 дан ортиқ ўқувчилар учун дастлаб жанговар қуроллардан фойдаланиш, техника хавфсизлиги қоидаларига риоя этиш бўйича машғулотлар ташкил этилди. Автомат ўқдонини патрон билан ўқлаш, аниқ мўлжалга олишни ўрганиш, автоматни нотўлиқ қисмларга ажратиш ва йиғиш каби машқлар ёшлар томонидан катта қизиқиш билан бажарилди.    

[gallery-22615]

Сўнг ҳар бир ўқувчи 100 метр узоқликда турган нишонга қарата ўқ узиб, ўз қобилият ва маҳоратини намойиш этди.

Жонибек ҚЎЗИМУРОДОВ (сурат), ЎзА