Мамлакатимиз иқтисодиётининг турли соҳалари ривожи учун илғор космик технологияларни қўллаб келаётган ”Ўзбеккосмос” агентлиги бир неча йиллардан буён ерни масофадан зондлаш дастури орқали уникал бўлган “Давлат космик мониторинг” тизимида фаолият олиб бормоқда.
Унга кўра, қишлоқ хўжалиги, сув хўжалиги, ер муносабатлари (кадастр), ўрмон хўжалиги, экология ва геология йўналишларида сунъий йўлдошлардан олинган космик суратларни қайта ишлаш орқали юқори аниқликдаги маълумотлар тармоқларга тақдим этилаяпти.
Бу борада Агентлик вакиллари доимий тарзда Республиканинг турли ҳокимлик ва идоралари билан учрашув ҳамда тақдимотлар ўтказишмоқда.
Хусусан, Жиззах вилояти ҳокимлигида ўтган навбатдаги учрашувда ҳудуднинг қишлоқ хўжалиги соҳасига замонавий технологиялар, жумладан, космик мониторинг воситаларини жорий этиш масаласи муҳокама этилди.
Учрашувда вилоят ҳокимининг қишлоқ ва сув хўжалиги масалалари бўйича ўринбосари Зафар Рўзиев, Рақамли технологиялар вазирлиги ҳузуридаги Космик тадқиқотлар ва технологиялар агентлиги бошқарма бошлиғи Улуғбек Раҳимов, шунингдек, Космик мониторинг ва геоахборот технологиялари маркази раҳбар ва мутахассислари иштирок этишди.
Муҳокамаларда қишлоқ хўжалиги ерларининг ҳолатини масофадан туриб мониторинг қилиш, уларнинг унумдорлигини баҳолаш, экин майдонларини аниқлик билан кузатиш имкониятлари, “Очиқ портал” платформаси орқали реал вақт режимида маълумотларни шакллантириш, таҳлил қилиш ва аниқланган муаммоларга тезкор чоралар кўриш механизмлари йўналишлари бўйича таклифлар кўриб чиқилди.
Шунингдек, ноқонуний ва ўзбошимчалик билан эгалланган ер майдонларини аниқлаш бўйича сунъий йўлдош тасвирларидан фойдаланиш имкониятлари бўйича ҳам таклифлар билдирилди.
Таъкидланганидек, ушбу технологиялар орқали қишлоқ хўжалиги соҳасида ресурслардан оқилона фойдаланиш, ҳосилдорликни ошириш, ҳамда ерларни назорат қилиш ва бошқаришнинг шаффоф механизмларини яратиш мумкин бўлади.
Қайд этиш лозим, бу ишлар Ўзбекистон Республикаси Президентининг 2024 йил 14 октябрдаги “2024 - 2026 йилларда иқтисодиёт тармоқларида аэрокосмик технологияларни жорий этиш чора-тадбирлари тўғрисида” ги фармони ижросини таъминлаш доирасида амалга оширилмоқда.
Учрашув якунида Жиззах вилоят ҳокимлиги ҳамда “Ўзбеккосмос” агентлиги ўртасида вилоятда космик мониторинг асосида ер ресурсларидан самарали фойдаланишни ташкил этиш юзасидан ҳамкорлик бўйича келишув имзоланди.
Н.Раҳмонова, ЎзА