Қиш фаслининг совуқ нафаси, айниқса, қор ёғиши билан боғлиқ об-ҳаво шароити йўл ҳаракати хавфсизлигига алоҳида эътибор қаратишни тақозо этади.

Шу маънода Жиззах вилоятининг олис Арнасой туманида қиш мавсумига хос мураккаб шароитларда транспорт ҳаракатининг узлуксизлиги ва фуқаролар хавфсизлигини таъминлаш борасида тизимли ва изчил чора-тадбирлар амалга оширилмоқда.

Жумладан, туман ҳудудидан ўтувчи автомобиль йўллари махсус техника ва ишчи кучлари жалб этилган ҳолда мунтазам равишда қордан тозаланмоқда. Бу эса ҳайдовчилар учун йўллардаги кўринишни яхшилаш, транспорт воситаларининг бемалол ҳаракатланишига шарт-шароит яратишга хизмат қилмоқда.

Шунингдек, йўл қатнов қисмларида сирпаниш ҳолатларининг олдини олиш мақсадида қум-туз аралашмаси сепиш ишлари жадал суръатларда олиб борилмоқда. Бу тадбирлар орқали нафақат транспорт воситаларининг барқарор ҳаракати таъминланяпти, балки йўл-транспорт ҳодисалари хавфи ҳам сезиларли даражада камайтирилмоқда.

Айтиш жоизки, мазкур чора-тадбирлар қиш мавсумида фуқаролар, ҳайдовчилар ва йўл ҳаракати қатнашчилари учун қулай ва хавфсиз муҳит яратишга қаратилган. Об-ҳаво шароитидан келиб чиққан ҳолда, бу йўналишдаги ишлар келгусида ҳам доимий назорат асосида давом эттирилиши режалаштирилган.

Қисқаси, Арнасой туманида қиш қийинчиликларига қарши кўрилаётган бундай амалий чоралар йўл ҳаракати хавфсизлигини таъминлаш, аҳоли манфаатларини ҳимоя қилишга хизмат қилаётгани билан аҳамиятлидир.

<iframe width="640" height="420" src="https://www.youtube.com/embed/JGrH4bo-9jg" title="Qish qiyinchiliklariga qarshi tizimli choralar" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Абдужалол Қаюмов (видео, сурат), ЎзА мухбири