Юрт тақдирига дахлдорлик, Ватанга фидойилик, аввало, қалбда пайдо бўлади, қасамёд эса буларнинг барчасини ўзида жамловчи улуғ рамздир. Бугун Ўзбекистон Республикаси Ҳарбий хавфсизлик ва мудофаа университетида курсантлар яқинлари ва кенг жамоатчилик гувоҳлигида тантанали равишда қасамёд қилишди.

Ватанга қасамёд кечагина пайдо бўлиб қолган анъана эмас. Бу қанчадан-қанча саркардаларимиз, ботирларимиз тилида янграган ва сўнгги нафасгача юракда сақланадиган муқаддас онтдир.  

Ўтказилган маросимда мудофаа вазири, генерал-лейтенант Шуҳрат Холмуҳаммедов курсантлар ва уларнинг яқинларини юртимизнинг мустақиллик байрамига ҳамоҳанг ўтказилган “Ватанга қасамёд” тадбири билан табриклади.  

Шунингдек, Мудофаа вазирлиги ҳузуридаги Жамоатчилик кенгаши аъзолари, давлат ва жамоат ташкилотлари вакиллари, ота-оналар юрт осойишталиги йўлида хизмат қилишга бел боғлаган ўғлонларга ўзларининг самимий тилакларини билдирдилар.  

Иқбол Мирзо, Ўзбекистон Республикаси Мудофаа вазирлиги ҳузуридаги Жамоатчилик кенгаши раиси:  

– Ҳарбий қасамёд қилаётган курсантлар ва уларнинг ота-оналарининг қалбидаги ҳиссиётни, фахру ғурурини уларнинг кўзларидан англаб турибман. Дунёдан касблар кўп, энг улуғи эса Ватан ҳимоячиси деган касбдир. Улар ўнлаб йигитлар орасидан ҳар томонлама сараланган ва ўзини, касбини шу юрт тақдирига боғлаганлардир. Муҳим масъулият эса шу касбга муносиб бўлиш керак. Бу йигитлар қасамёд қабул қилиши билан ҳимояланувчидан бевосита Ватан ҳимоячисига айланади. Олий Бош қўмондонимиз ислоҳотларининг барчасида юрт тинч бўлсин, дунё тинч бўлсин деган мақсадга интилмоқда. Шу маънода бизнинг армиямиз, мудофаамизда ҳам Ватан осойишталиги учун фидойиларни тарбиялашдек ислоҳотлар олиб борилаётганига ишончимиз комилдир.  

Тадбирдан сўнг, ҳарбий хизматчилар томонидан кўргазмали қўл жанги ва жанговар чиқишлар, концерт дастурлари намойиш этилади.  

<iframe width="650" height="420" src="https://www.youtube.com/embed/JqCW3iwpATE" title="Qasamyod — yigitni himoyalanuvchidan himoyachiga aylantiradi!" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Абдулазиз РУСТАМОВ, ЎзА