Рақобат қўмитаси томонидан ўтказилган таҳлиллар натижаларига кўра, бугунги кунда аҳолининг соғлиғи, ҳуқуқ ва манфаатларини, шунингдек давлат ва жамоат хавфсизлигини ҳамда жамоат тартибини таъминлаш мақсадида муайян бозорларда фаолият юритиш учун 67 та тадбиркорлик субъекти ва давлат ташкилотларида 81 та фаолият турлари бўйича эксклюзив ҳуқуқлар мавжудлиги маълум бўлди.

Эксклюзив ҳуқуқ аслида нима? Бу ҳуқуқ қандай ҳолатларда тадбиркорлик субъектлари ва давлат ташкилотларига берилади ёки бекор қилинади?

Саволларга Рақобат қўмитаси раиси маслаҳатчиси Отабек Усмонов жавоб берди:

—Эксклюзив ҳуқуқ - бу хўжалик юритувчи субъектлар ва давлат ташкилотларига муайян товарларни ишлаб чиқариш (хизматлар кўрсатиш, ишларни бажариш) ёки сотиш ёхуд сотиб олиш, шунингдек, ягона операторлик хизматларини кўрсатиш учун тақдим этилган мутлақ ҳуқуқ ҳисобланади.

Ўтган давр мобайнида Президентимизнинг тегишли қарорлари билан иқтисодиётда давлат иштирокини қисқартириш ва хусусий сектор учун кенг йўл очиш мақсадида 24 та тадбиркорлик субъектлари ва давлат ташкилотларига берилган эксклюзив ҳуқуқлар бекор қилинди.

Шунингдек, Ўзбекистон Республикаси Президентининг 2025 йил 28 февралдаги фармони ижросини таъминлаш мақсадида Рақобат қўмитаси томонидан Эксклюзив ҳуқуқлар берилган хўжалик юритувчи субъектларнинг рўйхати шакллантирилди ва эълон қилинди. 

Ўз навбатида, Рақобат қўмитаси эксклюзив ҳуқуқларни аниқлаш бўйича таҳлилларни тизимли равишда давом эттиради.  

Натижалар бўйича мазкур эксклюзив ҳуқуқлар берилган хўжалик юритувчи субъектларнинг рўйхатига ўзгартириш ва қўшимчалар киритилиши мумкин.

ЎзА мухбири Н.Раҳмонова ёзиб олди