Биз бир умр олдида қарздор бўлган зот – Она эканлигини яхши биламиз. Лекин яна бир улуғ зот борки, у ҳам онадек меҳрибон ва ардоқли. Бу бизнинг муаллимларимиз, азиз устозларимиздир. Ёш авлодни умуминсоний ва миллий қадриятларга садоқат, юксак маьнавий-ахлоқий фазилатлар руҳида тарбиялаётган устоздек улуғ зотларнинг олдида барчамиз бирдек қарздормиз албатта.

Кеча пойтахтимиздаги “Адиблар хиёбони”да мамлакатимиз таълим тараққиётига ўзларининг беминнат ҳиссаларини қўшиб келаётган зиёлилар жам бўлди. Тадбир аввалида меҳмонлар Ҳазрат Мир Алишер Навоий пойига гулчамбар қўйишди. Сўнг ҳамкасблар бир-бирларини байрам билан қутлаб, бугунги кунларга шукроналар айтишди.

Буюк маърифатпарвар бобомиз Абдулла Авлоний “Тарбия биз учун ё ҳаёт – ё мамот, ё нажот – ё ҳалокат, ё саодат – ё фалокат масаласидир…” дея таькидлаганида минг бора ҳақ эди. Сабаби, тарбияли, илмли инсонгина хонадонига, эл-юртига наф келтиради. Зеро, шоирлар ҳам энг шоҳ сатрларини дастлаб мана шу инсонларга бағишлаган:

Шарҳлаб бермоқ учун меҳнатингизни,

Сизнинг бир соатлик заҳматингизни.

Қирқ минг чироғ билан кўп шамлар керак,

Қирқ баҳор яна қирқ кўкламлар керак.

Дунёда мансаблар, саодат шоҳсупасига чиққанлар ниҳоятда кўпдир, лекин улар ҳам устозлари олдида ҳамиша қарздордирлар. Фақат угина ўзи етолмаган, аммо шогирди етган иқболга чин дилдан севина олади. Фақат угина уйқусиз ўтган тунлари, чеккан заҳматларини миннат қилмайди. Фақат унинг меҳру муҳаббати беғараз. Дунёнинг барча гуллари сизга поёндоз бўлсин. Борлиқдаги жамики яхшиликлар насиб этсин сизга. Ҳеч қачон завол кўрманг, азиз устозлар!

Байрамингиз муборак бўлсин!

<iframe width="853" height="480" src="https://www.youtube.com/embed/gC1iGyMjezY" title="Қалбга Ватан сўзин хатлаб бергансиз" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" allowfullscreen></iframe>

Ўткир Мирзо, Нишон Абдувоҳит (видео), ЎзА