Юртимиз азал-азалдан кўп миллатларга ватан бўлиб келган. Йиллар давомида бу ўлкаларда ўзбек, туркман, тожик, татар, қозоқ, қирғиз ва яна бошқа миллат вакиллари тинч-тотув истиқомат қилмоқда.

Шу боис уларнинг миллий урф одатларию, анъаналари ҳам бир-бирига жуда яқин. Масалан, биргина миллий кураш ёки бўлмаса кўпкари ўйинини олайлик. Ушбу спорт турлари Ўрта Осиёда яшовчи ҳар бир миллатнинг миллий спорт турлари сифатида қаралади.

Қашқадарё вилоятининг Касби туманида ҳам “Дўстлик ва ҳамжиҳатлик улуғланган юрт” шиори остидаги тадбирлар юқори кайфиятда ўтказилди.

Мамлакатимизда бағрикенглик ва миллатлараро тотувликни тарғиб қилиш борасида доимий равишда кенг кўламли ишлар амалга оширилмоқда. Давлат сиёсатининг устувор йўналишларидан бири сифатида дўстлик муҳитини мустаҳкамлаш, ёш авлодни миллий ва умуминсоний қадриятларга ҳурмат руҳида тарбиялашга алоҳида эътибор қаратилмоқда.

Шу муносабат билан Касби туманининг аҳолиси асосан тожик тилида сўзлашувчи “Қамаши” маҳалласида “Дўстлик ва ҳамжиҳатлик улуғланган юрт” шиори остида бир қатор маданий-маърифий ва спорт тадбирлари ташкил этилди. Ушбу тадбирлар орқали жамиятда миллатлараро бирдамликни мустаҳкамлаш, турли миллат вакиллари ўртасида ўзаро ҳурмат ва ҳамжиҳатлик муҳитини янада ривожлантириш кўзда тутилган.

Тадбирлар доирасида концерт дастури, фольклор гуруҳлари чиқишлари, миллий кўргазмалар, иншолар танлови, шунингдек, ҳудуд ёшлари ўртасида спортга бўлган қизиқишни ошириш, соғлом турмуш тарзини тарғиб қилиш мақсадида шахмат-шашка, стол тенниси ва миллий кураш беллашувлари ўтказилди.

[gallery-22600]

Бу Касби туманидаги турли миллат вакиллари ўртасида дўстлик ва ҳамжиҳатликни янада мустаҳкамлашга, ёшларни спорт ҳамда маданият соҳаларида фаол иштирок этишга рағбатлантиришга, шунингдек, миллий қадриятларни ҳурмат қилишга чақирган муҳим тадбирлардан бири бўлди.

Маълумот ўрнида, бу каби тадбирлар туманнинг “Фазли”, “Пахтакор” ва “Жар кўча” маҳаллаларида ҳам кўтаринки руҳда ташкил этилди. 

Ўлмас Баротов, Жамшид Норқобилов (сурат), ЎзА мухбирлари