Жаҳон иқтисодиёти ва дипломатия университетида “Пул-кредит сиёсати орқали иқтисодиётни тартибга солиш: асосий тушунчалар ва тамойиллар” мавзусида Марказий банк вакиллари иштирокида семинар-тренинг ўтказилди.

Ушбу тадбирдан кўзланган мақсад иштирокчиларни пул-кредит сиёсати асослари, Марказий банк фаолиятининг устувор йўналишлари ва амалда қўлланиладиган инструментлар билан яқиндан таништиришдан иборат.

Тренинг доирасида пул-кредит сиёсатининг асосий йўналишлари, инфляцион таргетлаш режими, макроиқтисодий барқарорликни таъминлаш каби йўналишларда амалга оширилаётган ишларга батафсил тўхталиб ўтилди. Шунингдек, турли мамлакатлар марказий банкларининг пул-кредит сиёсатига ёндашувлари, инфляцион таргетлаш режимига оид тажрибалари, бу борада халқаро амалиёт таҳлил қилинди ҳамда Марказий банк фаолиятидан олинган мисоллар орқали назария ва амалиёт ўртасидаги боғлиқлик тушунтириб берилди.

Интерактив тарзда ўтган тадбирда профессор-ўқитувчилар, илмий изланувчилар ҳамда талабалар ўзларини қизиқтирган саволларга Марказий банк мутахассисларидан атрофлича жавоблар олишди.

Семинар-тренинг иштирокчиларга пул-кредит сиёсатидаги замонавий тенденциялар ва ислоҳотлар хусусида атрофлича маълумот олиш, билим ва кўникмаларини янада мустаҳкамлаш имконини берди.

Ш.Маматуропова, ЎзА