Муносабат

Пойтахтимизда бўлиб ўтган тарихий анжуман — Парламентлараро Иттифоқнинг 150-юбилей ассамблеяси дунё парламентарийларини юртимизда жам бўлиб, муҳим масалаларни муҳокама қилиш ва муайян келишувларга эришишларида сиёсий мулоқот майдонига айланди. Саммитда давлатимиз раҳбари нутқ сўзлаб, бугунга кунда ўта долзарб бўлган ташаббусларни илгари сургани маҳаллий ва хорижий экспертлар, парламентарийлар томонидан кенг эътироф этилмоқда.  

Бу борада Олий Мажлис Қонунчилик палатасидаги Ўзбекистон "Миллий тикланиш" демократик партияси фракцияси раҳбари Алишер Қодиров ҳам ўз муносабатини баён қилди:

— Парламентлараро Иттифоқнинг 150-юбилей ассамблеясининг Тошкентда ўтказилгани Янги Ўзбекистоннинг сиёсий ислоҳотлари натижаларининг яна бир халқаро эътирофи бўлди, десак хато бўлмайди. Бу айни пайтда янги парламентга бўлган муносабат, парламентнинг самарали фаолият нуқтаи назаридан тубдан ўзгаргани, партияларга бўлган қарашлар ва жамиятдаги сиёсий ҳамда парламент тафаккурининг шаклланиши, қолаверса, Президент сайловларининг халқимиз хоҳиш ва истаги асосида ўтгани, энг асосийси эса Бош Қомусимизнинг том маънода очиқ-шаффоф, инсонпарвар жамият нуқтаи назаридан янгилангани каби ҳолатлар пойтахтимизнинг ана шундай нуфузли анжуманга мезбонлик қилишига асос бўлди.

Шу ўринда Тошкент саммитида иштирок этган 140 дан ортиқ давлатнинг 2 мингга яқин депутатларига йўлланган Президент мурожаати нафақат Ўзбекистон, балки бутун Марказий Осиё минтақаси аҳолисининг овозидек янграганини айтиш жоиз. Шунинг учун ҳам Президентнинг дунё тинчлигини ўғирлаётган глобал муаммолар ҳақидаги фикрларини миллионлаб фуқаро қўллаб-қувватламоқдалар.

Таҳлилчиларнинг фикрича, бугун дунёнинг 100 дан зиёд ҳудудида ҳарбий низолар давом этяпти. Шу боис ҳам тарихий мурожаатда минг-минглаб оилаларга айрилиқ дардини олиб кирган низоли ҳолатларга алоҳида урғу берилди. Хусусан, Украина инқирози Президентнинг фикрича, БМТ раҳбарлигида, амалдаги халқаро ҳуқуқ нормалари асосида ҳал этилиши керак.

Мурожаатда яна бир оғриқли нуқта — Фаластин инқирози учун ягона ечим "икки халқ учун — икки давлат" тамойили бўлиши шартлиги билдирилди. Шунингдек, жафокаш Афғонистон халқини ҳам ўз муаммолари билан ёлғиз қолдирмаслик кераклигига ҳам эътибор қаратилганини таҳлилчилар алоҳида эътироф этмоқдалар.

Қайта тикланадиган энергияга устуворлик бериш, "яшил" технологияларга ўтишни рағбатлантириш — келажак авлодлар олдидаги мажбуриятимизга айланиши кераклиги билан боғлиқ ташаббус эса келажак ҳақидаги ғамхўрлик белгисидек янгради, дейиш мумкин.

Президент, шунингдек, сунъий интеллект соҳасида бутун дунёда ўйин қоидалари бир хил бўлиши лозимлигини таъкидладики, бу ушбу масаланинг ниҳоятда нозиклиги билан боғлиқдир.

Давлат раҳбари Парламентлараро Иттифоқ тизимида Ёшлар парламентларининг глобал платформаси кераклигига ҳам бежиз эътибор қаратгани йўқ, албатта. Энг муҳими, Янги Ўзбекистоннинг ана шундай таклиф ва қатъий талабларини дунё эшитиб, ўзи учун хулосалар чиқариши оддий ҳолга айланяпти.

Хулоса ўрнида таъкидлаш лозимки, Парламентлараро Иттифоқнинг 150-юбилей саммитининг Тошкентда ўтказилиши замирида аслида Ўзбекистонга, қолаверса, ўз қўшнилари билан бирлик ва биродарлик ришталарини қайта тиклаган Марказий Осиё минтақасига бўлган ишонч ётибди.

ЎзА мухбири Муҳтарама Комилова ёзиб олди.