“Ўзэкспомарказ” миллий кўргазма мажмуасида “Электротехника ва электроника – E-Tech Expo 2025” халқаро кўргазмаси ўз ишини бошлади. Унда юртимизнинг ушбу йўналишдаги саноати ютуқлари, янги технологик ечимлар ҳамда экспорт салоҳиятимиз кенг намойиш этилди.

Бу ерда кўпроқ маҳаллий ишлаб чиқарувчиларимизнинг хилма-хил, халқ эҳтиёжи учун чиқарилаётган тайёр ва ярим тайёр маҳсулотларини кўриш қувонарли албатта. Зеро, бугун Ўзбекистон нафақат ички бозорни электротехника маҳсулотлари билан таъминлай оляпти, балки йилига 1.5 млрд долларлик экспортни ҳам амалга оширмоқда. Тадбир ташкилотчиси “Ўзэлтехсаноат” уюшмаси тадбиркорларимизнинг янги маҳсулотларини кенг оммага таништириш учун барча имкониятларни ишга солмоқда.   

Кўргазма павильонларидан асосан замонавий маиший техникалар, кабель-сим маҳсулотлари, электр ўтказгичлар, энергия тежамкор ёритиш тизимлари, трансформаторлар, автоматлаштирилган бошқарув ечимлари, қуёш энергияси асосидаги инновацион қурилмалар ўрин олди. Айниқса дастурий таъминотга асосланган янги технологияларга қизиқиш юқори бўлди.          

Кўргазма доирасида электротехника тармоғида  халқаро ҳамкорликни мустаҳкамлаш, хорижий инвесторлар билан янги лойиҳаларни йўлга қўйиш ва маҳсулотлар экспортини кенгайтиришга қаратилган  В2В учрашувлар, бизнес-форумлар ўтказиш ва ҳамкорлик меъморандумларини имзолаш маросимлари кўзда тутилган.  

<iframe width="650" height="420" src="https://www.youtube.com/embed/PL21xX6jOuI" title="Poytaxtda elektrotexnika va elektronika mahsulotlari ko‘rgazmasi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Санжар Тошпўлатов, Ойбек Давронов, Улуғбек Тўхтаев, ЎзА