Кеча 31 март куни соат тахминан 12.19 да Избоскан тумани Мирзо Улуғбек маҳалласи ҳудудида жойлашган “Аҳмадали ҳожи” жоме масжиди таҳоратхонасида ҳаво-газ аралашмасининг чақнаши – портлаш содир бўлди.

Бахтсиз ҳодиса – портлаш юз берган воқеа жойига зудлик билан ўт ўчириш-қутқарув гуруҳлари, шунингдек, вилоят ҳокими Шуҳратбек Абдураҳмонов, Фавқулодда вазиятлар, Ички ишлар бошқармалари раҳбар ва масъуллари, тез тиббий ёрдам хизмати ходимлари етиб борган. Чақнаш билан боғлиқ вазият тўлиқ назоратга олинган. 

Кеча вилоят ҳокимлиги, фавқулодда вазиятлар бошқармаси, вилоят прокуратураси томонидан воқеа бўйича дастлабки маълумотлар эълон қилинди. Портлаш оқибатида 10 нафар фуқаро турли даражада тан жароҳати олган, 3 нафар фуқаро – М.Абдуллаев, Ж.Анваров, Б. Бурхонов вафот этган. 

Мухбирларимиз Избоскан туманида бўлиб, ҳодиса юзасидан қатор масъул шахслар билан  суҳбатлашди.

Маҳмуджон Нурматов, Избоскан тумани фавқулодда вазиятлар бўлими бошлиғи, подполковник:

 – Кеча, юқорида айтилганидек, соат 12.19 ларда масжид таҳоратхонасида портлаш юз берганлиги ҳақида хабар олингач, фавқулодда вазиятлар бўлимининг 2 та қутқарув отряди, 2 та ёнғин-қутқарув экипажи воқеа жойига зудлик билан етиб келган.

Шунингдек, воқеа жойига Ички ишлар, Миллий гвардия, Тез тиббий ёрдам хизмати ходимлари ҳам етиб борган. Портлаш билан боғлиқ вазият тўлиқ назоратга олинган, зарур қутқариш ишлари олиб борилган.

Ҳодиса натижасида таҳоратхонанинг девор ва том конструкцияларига зарар етган, қулаб тушган, ёнғин содир бўлмаган. 

Портлаш оқибатларини бартараф этиш, қутқариш, жабрланганларга ёрдам кўрсатиш ишларида юқоридаги хизматларнинг 500 нафарга яқин ходим ва мутахассислари иштирок этди, 70 га яқин турли техника воситалари жалб этилди. 

Бахтсиз ҳодиса туфайли вафот этган юртдошларимизнинг оила аъзолари ва яқинларига ҳамдардлик билдирамиз. 

Ҳодисанинг келиб чиқиш сабаблари тузилган ҳукумат комиссияси томонидан ўрганилиб, тегишли хулосалар эълон қилинади. 

Аҳрорбек Абдужабборов, Избоскан тумани тиббиёт бирлашмаси раҳбари:

– Аввало, бахтсиз ҳодиса туфайли вафот этган фуқароларнинг яқинларига ҳамдардлик билдираман. 

Кеча воқеа содир бўлганлиги ҳақида хабар келиб тушиши билан туман тез тиббий ёрдам хизмати шифокорлари зудлик билан воқеа жойига етиб борган. Жабрланганлар, стресс ҳолатига тушган фуқароларга биринчи тиббий ёрдам кўрсатилди. 

Туман марказий шифохонасига портлаш натижасида турли даражада тан жароҳати олган 10 нафар фуқаро келтирилган. Уларнинг 2 нафарига амбулатор ёрдам кўрсатилиб, ҳолати ижобий бўлганлиги учун уйларига жавоб берилди. 8 нафар тан жароҳати олган фуқарога биринчи тиббий ёрдам кўрсатилиб, улар вилоят тез тиббий ёрдам марказига юборилди. 

Ҳозир ҳолати ўртача-оғир аҳволда бўлган ана шу фуқаролар стационар шароитда даволанмоқда. 

Вазирлар Маҳкамасининг тегишли фармойиши билан тузилган Ҳукумат комиссияси, вилоят ҳокимлиги томонидан портлаш натижасида вафот этган фуқароларнинг дафн маросимларини ўтказиш, уларнинг оила аъзоларига ҳар томонлама кўмаклашиш бўйича зарур барча ишлар амалга оширилмоқда. 

[gallery-22603]

Мазкур ҳолат юзасидан Андижон вилоят прокуратураси томонидан Ўзбекистон Республикаси Жиноят кодексининг 205-, 259- моддалари билан жиноят иши қўзғатилиб, дастлабки тергов ҳаракатлари олиб борилмоқда.

                                                          Ф. Убайдуллаев,
З.Умрзоқов (сурат), ЎзА мухбирлари