Коррупцияга қарши курашиш бўйича миллий кенгашнинг кенгайтирилган йиғилишида белгиланган вазифалар ижросини таъминлаш чоралари ҳар бир давлат хизматчиси, ҳар бир фуқарога масъулият юклайди.
Шундан келиб чиқиб, жойларда, айниқса, давлат хизматчилари ўртасида давлатимиз раҳбарининг коррупцияга барҳам беришга оид фикрлари тушунтирилиши асносида шу йўналишда қўйилган вазифалар ижросини таъминлашдаги масъулиятга урғу берилмоқда.
Сенат Раиси Танзила Норбоева Давлат бошқаруви академиясида тингловчилар билан ўтказган мулоқотда коррупция иллатини бартараф қилишда "ҳуқуқий бўшлиқ"ни тўлдириш бўйича фикр алмашди.
– Қонунларимиз кўп жиҳатдан коррупциянинг олдини олишга, давлат хизматлари кўрсатилиши жараёнида инсон омилини, унинг аралашувини камайтириб, шу орқали порахўрликни йўқ қилишга қаратилган, - деди Т.Норбоева. – Бироқ, қонун ости ҳужжатлари, турли идоравий қоғозлар орқали қонунни айланиб ўтиш ҳолатлари мавжуд. Бунга биргаликда барҳам беришимиз керак.
Таъкидландики, бу борадаги илмий ишлар, айнан шу йўналишдаги тадқиқотларга катта аҳамият бериш лозим. Коррупциявий ҳолатлар кўп учраётган соҳаларни кўплаб кўрсаткичлар бўйича таҳлил қилиб, унинг "ичига кириш" зарур.
Айниқса, коррупциянинг олдини олишдаги профилактик чоралар, коррупцияга мойилликни эрта аниқлаш жуда муҳим.
Тадбирда тингловчиларнинг таклифлари ва мулоҳазалари ҳам тингланди. Полиграф техник ускунасини кенг жорий қилиш таклифи билдирилди.
Агар кадрлар айнан полиграф ускунасидан ўтказилиб, унинг ижобий хулосаси орқалигина ишга қабул қилинса, коррупциявий ҳолатларни чеклашда ижобий натижаларга эришиш мумкин.
Маълумот учун айтиб ўтиш керакки, полиграф – махсус психологик тадқиқот ўтказувчи ускуна бўлиб, у орқали турли саволларга инсон танасининг, нафас олишининг, юрак-қон томир тизимининг реакциясини аниқлаш имкони бор. Уни ходимларда коррупцияга мойилликни аниқлашда ёки исталган кишининг турли жиноятларни бажаргани ёки бажармаганини аниқлашда самарали қўллаш мумкин.
Тадбирда тингловчиларни қизиқтирган саволларга жавоб берилди.
Н.Абдураимова,
ЎзА