Польша ҳукумати Германия ва Литва билан чегара назорати тартибини 4 октябргача узайтирди. 7 июлда жорий этилган мазкур муваққат чорани мамлакат ички ишлар вазири Марсин Кервински “ноқонуний миграциянинг янги йўналишларига қарши” зарур, дея таърифлади.
Россия ва Беларусь орқали миграция оқими камайиши натижасида мигрантлар Европа Иттифоқига энди Литва ва Латвия орқали киришга ҳаракат қилмоқда. Шу боис Польша ва бошқа қўшни давлатлар хавфсизлик чорасини кучайтирган.
Бош вазир Дональд Туск илгари берган баёнотида ГФРдан минглаб муҳожирлар Польшага қайтишга уринаётгани номақбул амалиёт эканини билдирган ва ушбу мамлакат Шенген ҳудудидаги ГФР ва Литва билан чегара назоратини вақтинча тиклашга қарор қилган. Расмийлар тартибни Германия билан 52, Литва билан эса 13 манзилда ўзгартирган.
Литва айни масалада Польша билан яқин ҳамкорлик давом этишини таъкидлаган. Канцлер Фридрих Мерц ҳам Шенген зонасида эркин ҳаракат сақланиши, бироқ бу тартиб ноқонуний миграция воситасига айланмаслиги лозимлигига урғу берган.
Расмий статистика кўҳна қитъага ноқонуний миграция оқими кучайганини кўрсатмоқда. Натижада кўплаб давлатлар ўз хавфсизлик сиёсатини қайта кўриб чиқишга мажбур бўляпти.
Мусулмон Зиё, ЎзА