Экологик тоза маҳсулотлар ишлаб чиқаришни кенгайтириш, аграр секторда экспорт салоҳиятни ошириш доим эътиборда.

Бу ўринда хандон писта плантaцияларини барпо этиш ва парваришлаш, жумладан контейнерларда етиштирилган кўчатлардан барпо этиш ва кўпайтириш орқали экспортбоп маҳсулот етиштиришга алоҳида эътибор қаратилмоқда.

Тошкент шаҳри ва Пискент туманида “Ўрмонларни тиклаш бўйича 3-семинар” доирасида халқаро тадбир бўлиб ўтди. Унда ўрмончилик соҳасидаги етакчи маҳаллий ва халқаро олимлар, мутахассислар, тадқиқотчилар ҳамда амалиётчилар иштирок этди.

Тадбирда писта плантациялари, замонавий кўчат етиштириш технологиялари ва илдиз тизимини ривожлантириш бўйича маърузалар тақдим этилди. Конкук университети (Корея) фахрий профессори Ким Чон Чжин муваффақиятли ўрмон барпо этишда илдиз тизими ривожланган, контейнерда етиштирилган кўчатлардан фойдаланишнинг афзалликлари ҳақида маълумот берди.

Шунингдек, Ўзбекистон Республикаси Ўрмон хўжалиги илмий-тадқиқот институти катта илмий ходими Бобомурод Эшонқулов  писта плантацияларини барпо этишда Ўзбекистонда амалга оширилаётган лойиҳалар ҳақида маълумот берди. Пистанинг агроиқлим шароитига мослашуви ва ўсиш нуқталари ҳақида фикрлар тингланди.

Семинарнинг иккинчи кунида иштирокчилар Тошкен вилояти Пискент туманидаги Дўнгқўрғон бўлимида жойлашган давлат кўчатхонасига ташриф буюриб, амалий машғулотларда иштирок этди. Suppro Co. Ltd компанияси директори Юн Тхэк Син кўчатхонада олиб борилаётган қурилиш ва модернизация ишлари ҳақида маълум қилди. Кейинчалик, профессор Ким Чон Чжин контейнерда писта кўчатлари етиштириш жараёнини намойиш қилди.

Таъкидлаш жоизки, писта плантациялари фақатгина иқтисодий манфаатга эга эмас, балки экологик барқарорлик, биохилма-хилликни сақлаш ва деградацияланган ерлардан самарали фойдаланишда ҳам муҳим аҳамият касб этади.

Муҳайё Тошқораева, ЎзА