Парламентлараро Иттифоқнинг 150-юбилей ассамблеясини ўтказишдан мақсад парламентлар ўртасидаги ҳамкорликни ривожлантириш, тинчлик ва демократияни мустаҳкамлашдир.

– Президентимиз Шавкат Мирзиёевнинг таклифига биноан ташкил этилаётган ушбу ассамблея Марказий Осиё минтақасида илк бор ўтказилмоқда, – деди Сенатнинг Фан, таълим ва соғлиқни сақлаш масалалари қўмитаси раиси Баҳром Абдуллаев. – Шу сабабдан ассамблеяга пухта тайёргарлик кўриш мақсадида ташкилий қўмита тузилиб, барча зарур чора-тадбирлар амалга оширилди. 

Ассамблеянинг "Ижтимоий тараққиёт ва адолат учун парламент ҳаракати" мавзуси бугунги кунда долзарб аҳамият касб этади. Аҳолини ижтимоий ҳимоя қилиш, камбағалликни қисқартириш, қонун устуворлигини таъминлаш, инсон ҳуқуқларини ҳимоя қилиш, гендер тенглигини таъминлаш, илм-фан ва технологияларни ривожлантириш ҳамда ёшларни қўллаб-қувватлаш каби масалалар кун тартибидан ўрин олган. ​

Ўзбекистон сўнгги йилларда парламент тизимини ислоҳ қилиш, қонун устуворлигини таъминлаш ва фуқаролик жамиятини ривожлантириш йўлида муҳим қадамлар қўйди. Парламентимиз халқ манфаатларини ҳимоя қилиш, демократик қадриятларни мустаҳкамлаш борасида изчил ишларни амалга ошираётир. ​

Ушбу ассамблея доирасида биз глобал муаммоларни ҳал этишда парламентларнинг ролини кучайтириш, тажриба алмашиш ва ўзаро ҳамкорликни янада ривожлантириш имкониятига эга бўламиз. Ишончим комилки, бу йирик анжуман самарали мулоқотлар ва муҳим қарорлар қабул қилиш учун қулай майдон бўлиб хизмат қилади.   

Н.Абдураимова, ЎзА