Миллий паралимпия қўмитаси томонидан жорий йил апрель ойи янги умидлар ва катта марралар сари интилиш ойи сифатида белгиланди.

Давлатимиз раҳбари томонидан имзоланган “Ногиронлиги бўлган шахсларни қўллаб-қувватлаш тизимини такомиллаштиришга доир қўшимча чора-тадбирлар тўғрисида”ги қарорига асосан маҳаллаларда истиқомат қилаётган, ўз куч ва иродасига таяниб юксак марраларни кўзлаётган, орзу-ниятлар билан умргузаронлик қилаётган шахслар иштирокида ташкил этиладиган "Беш ташаббус паралимпиадаси" спорт мусобақалари ва "Инсон учун" инклюзив югуриш марафонлари ушбу ойнинг аҳамиятини янада оширишга қаратилган.

Бу тадбирлар ҳар бир иштирокчига ўз иродаси, матонати ва ички куч-қудратини синаб кўриш, шу билан бирга имкониятларини юксак чўққиларга олиб чиқиш учун зарур шарт-шароитларни яратади.

–Айтиш лозим, жорий йилнинг февраль ойида Президентимиз Шавкат Мирзиёев раислигида ўтказилган видеоселектор йиғилишида ирода ва матонат тимсоли бўлган инсонлар учун янги имкониятлар эшигини очиш лозимлиги таъкидланган эди. Шу мақсадда, апрель ойини "Ирода ва матонат ойлиги" деб номлаш ташаббуси илгари сурилди ва у кенг жамоатчилик томонидан қўллаб-қувватланмоқда, – дейди Миллий паралимпия қўмитаси раиси ўринбосари Ҳикмат Тошматов.

"Ирода ва матонат ойлиги" доирасида республикамизнинг 208 та туман ва шаҳарларида ногиронлиги бўлган шахслар учун "Беш ташаббус паралимпиадаси" оммавий спорт мусобақалари ташкил этилади.

Бу мусобақаларда иштирок этиш учун бугунгача 75 минг нафардан ортиқ матонат соҳиблари рўйхатдан ўтгани қайд этилди.

"Ирода ва матонат ойлиги" доирасида республикамизнинг 6 та шаҳрида "Инсон учун" инклюзив югуриш марафонлари ташкил этилиши белгиланган бўлиб, 4 апрель куни Жиззах шаҳрида, 5 апрелда  Гулистонда, 13 апрель Тошкент шаҳрида, 17-18 апрель кунлари Андижонда, 19-20 апрелда Наманган шаҳрида, 21-22 апрель кунлари Фарғона шаҳрида, 29-30 апрелда эса Шаҳрисабз шаҳрида ўтказилмоқда.

Эслатиб ўтамиз, "Инсон учун" инклюзив югуриш марафонида рўйхатдан ўтиш жорий йилнинг 5 апрелига қадар давом этади.

Т.Рўзиев, ЎзА