Шу кунларда Сингапурда пара сузиш бўйича йилнинг энг нуфузли мусобақаларидан бири бўлган жаҳон чемпионати баҳслари бўлиб ўтмоқда.

Чемпионатнинг кеча ўтказилган баҳсларида иштирок этган ҳамюртларимиздан Азизбек Бойназаров (С8) ва Мубинабону Халилова (С13) финал босқичида ўз омадини синаб кўрди.

Бойназаров 100 м масофага чалқанча сузиш дастури финалида 1:11.15 сонияда маррага етиб келган бўлса, Халилованинг 100 м масофага брасс усулида сузиш беллашувларидаги якуний натижаси 1:23.56 сония кўринишни олди.

Бугун, 23 сентябрь куни жаҳон чемпионатининг навбатдаги кунида Мубинабону Халилова эркин усулда, Азизбек Бойназаров баттерфляй йўналишидаги саралаш мусобақаларида қатнашади. Шунингдек, яна бир матонатли пара спортчимиз Егор Болотов ҳам эркаклар ўртасида эркин усул баҳсларининг саралашида қатнашади.

Эслатиб ўтамиз, 75 та мамлакатнинг 580 нафардан зиёд пара сузиш вакиллари қатнашаётган жаҳон чемпионатида Ўзбекистон терма жамоасининг 6 нафар иродали спортчиси қатнашмоқда.

Мусобақалар 28 сентябрга қадар давом этади.

Т.Рўзиев,

ЎзА