Икки марта пневмонияни бошидан кечирган Папа Франциск пайшанба куни Италиянинг энг гавжум қамоқхоналаридан бири – “Regina Coeli” турмасига кутилмаганда ташриф буюриб, маҳбусларни Пасха байрами олдидан қутлади.

“Reuters” хабар беришича, 12 йиллик фаолияти даврида саломатлиги билан боғлиқ энг оғир инқироздан ўтиб олгач, тез-тез омма олдида чиқиш қилаётган 88 ёшли понтифик Ватикан ташқарисида қисқа юриш қилди. Қамоқхона атиги беш дақиқалик масофада жойлашган.

Автомобилдан ногиронлик аравачасига ўтирган Рим католик черкови етакчисини ёрдамчилари муассасага олиб келганда, қўриқчилар ва ташкилот ходимлари олқиш билан кутиб олди.

Охирги икки чиқишида бўлгани каби, Папа кислород найчаси ёрдамисиз нафас олаётгани кўпчиликнинг эътиборини тортди.

Франциск қамоқда ярим соатча бўлиб, 70 га яқин маҳбуслар гуруҳи билан учрашган.

– Сиз билан яқин бўлишни хоҳлардим, – деди у. – Мен ўзингиз ва оилангиз учун ибодат қиламан.

Трастевер сайёҳлик туманидаги XVII асрга мансуб, ҳозир эркаклар қамоқхонасига айлантирилган “Regina Coeli” монастирида, Адлия вазирлиги маълумотига кўра, айни пайт 1 100 га яқин маҳбус бор. 628 кишига мўлжалланган иншоот учун бу қарийб икки баробар кўп.

Ушбу турмага охирги марта 2018 йил келган Папа Ватиканнинг пасха байрами олди тадбирларида қай даражада фаол иштирок этиши номаълум.

Қамоқдан чиқаётганда машинасига яқинлашган журналистларнинг шу ҳақдаги саволига Франциск жилмайиб, оҳиста жавоб берди: Иложи борича...