Хитой Коммунистик партияси (ХКП) Марказий қўмитаси Халқаро бўлим мудири Лю Цзяньчао Ўзбекистонга ташрифи давомида OʻzLiDeP Сиёсий Кенгашида ҳам бўлиб, партия раҳбари Актам Ҳайитов билан учрашди. Меҳмонлар қаторидан Хитойнинг Ўзбекистондаги Фавқулодда ва Мухтор элчиси Юй Цзун ҳам жой олди.

Меҳмонларга OʻzLiDePнинг фаолияти, партиянинг мамлакатни ислоҳ қилиш жараёни ва “Ўзбекистон – 2030” стратегияси ижросидаги роли ҳақида маълумот берилди. Ўз навбатида, делегация вакиллари ХКП фаолияти, унинг давлатлар билан дўстона муносабатларни йўлга қўйиш соҳасидаги сиёсати ҳақида маълумотлар берди.

Суҳбат чоғида ХКП вакилининг ушбу ташрифи партиялар ўртасидаги ҳамкорликни муваффақиятли ривожлантиришнинг муҳим кўрсаткичи эканлиги қайд этилди.

Таъкидлаш жоизки, OʻzLiDeP ва Хитой Коммунистик партияси ўртасидаги муносабатлар мустаҳкам асосга эга. Масалан, ЎзЛиДеП делегацияси ХКПнинг “ХКП ва хорижий мамлакатлар сиёсий партиялари ўртасида юқори даражадаги мулоқот”, “Кучли сиёсий партияни қуриш: муаммо ва истиқболлар” мавзусидаги форумлар, “Хитой – Марказий Осиё” сиёсий партиялар мулоқоти ва бошқа тадбирларида иштирок этган.

Учрашув доирасида OʻzLiDeP ва Хитой Коммунистик партияси ўртасида ҳамкорлик тўғрисидаги меморандум имзоланди. Ушбу ҳужжат мамлакатларимиз ўртасидаги ҳар томонлама стратегик шериклик муносабатларининг таркибий қисми эканлиги, партиялараро ҳамкорликни янги босқичга кўтариши қайд этилди.

М.Комилова, ЎзА