Қурилиш ва уй-жой коммунал хўжалиги вазирлиги томонидан ўтказилган брифингда қайд этилишича, давлат архитектура назорати департаменти томонидан 333 та ўзбошимчалик билан қурилган бино ва иншоотлар аниқланган.

Шулардан 75 тасига маъмурий баённома расмийлаштирилган, 258 тасига нисбатан эса маъмурий жазо чоралари қўлланилган.
“Шаффоф қурилиш” миллий ахборот тизими жорий этилиб, Қурилиш ва уй-жой коммунал хўжалиги вазирлиги томонидан ўзбошимчалик билан қурилган бино ва иншоотларни аниқлаш ҳамда бартараф этишга оид автоматлаштирилган тизим ишлаб чиқилди. Ушбу тизим Адлия вазирлигининг «Нотариус», Ички ишлар вазирлигининг “Э-маъмурий иш”, Олий суднинг «Адолат», Кадастр агентлигининг «УзКад» ахборот тизимлари билан интеграция қилинган. 

Ҳозирги кунда вазирликнинг Давлат архитектура назорати департаменти ҳамда туман ва шаҳар бўлимлари ходимлари 232 та махсус планшетлар билан таъминланган.

Шунингдек, мазкур тузилмалар ходимлари аттестациядан ўтказилиб, уларга махсус гувоҳномалар топширилган.

Ш. Маматуропова, ЎзА