Коррупцияга қарши курашиш жараёнида халқаро ISO 37001:2016 сертификатини қўлга киритиш муҳим аҳамиятга эга.

Бу сертификат ташкилотда коррупцияга қарши курашишнинг самарали тизимини яратишнинг халқаро усулларини ўзида жамлаган, коррупцияга қарши мукаммал бошқарув тизимини йўлга қўйишга хизмат қиладиган халқаро стандартдир. 

Бу коррупцияга қарши бошқарув тизимини ишлаб чиқиш, жорий этиш, қўллаб-қувватлаш, ташкил қилиш ва такомиллаштириш учун талаб ва кўрсатмаларни белгилайди.

Ўзбекистон Нотариал палатаси ISO 37001:2016 Коррупцияга қарши кураш менежменти тизимининг мувофиқлик сертификатига эга бўлган Ўзбекистондаги илк нодавлат нотижорат ташкилоти (ННТ)га айланди.  

Тошкент шаҳрида Ўзбекистон Нотариал палатасига Халқаро стандартлаштириш ташкилоти (ISO)нинг cертификатларини топшириш маросими бўлиб ўтди.  

Нотариал палата раиси Дилшод Ашуров ISOнинг вакили – Австрия Республикасининг Ўзбекистондаги элчихонаси тижорат маслаҳатчиси Рудольф Лукавскининг қўлидан ISO 37001:2016 стандарти сертификатини  қабул қилиб олди.

Мазкур сертификатни қўлга киритиш масаласи Коррупцияга қарши курашиш агентлиги вa Нотариал палата ўртасида имзоланган меморандум вa чора-тадбирларда кўзда тутилган эди.

Айтиб ўтиш керакки, бугунги кунда 70 дан ортиқ вазирлик ва  идора бу сертификатни қўлга киритган. Мазкур сертификат палатанинг фаолияти коррупцияга қарши  кураш менежменти тизимининг халқаро стандартларга мувофиқлигини билдиради ҳамда барча даражадаги тизим идораларида шаффофлик вa очиқликни таъминлаш юзасидан катта масъулиятни юклайди.

Н.Абдураимова, ЎзА