Марказий банкда оммавий ахборот воситалари вакиллари ҳамда блогерлар учун "Ўзбекистон ҳудудида банк карталарига асосланган чакана тўловларнинг ривожланиши ва истиқболлари" мавзусида медиа-мулоқот ўтказилди.
Унда ўтган йилларда мамлакатимизда нақд пулсиз тўловлар бозорида қайд этилган асосий кўрсаткичлар ва ривожланиш тенденциялари қайд этилди.
Жумладан, 2024 йилда банклараро тўлов тизими орқали амалга оширилган транзакциялар ҳажми 7 279 трлн. сўмга етди. Тезкор тўловлар тизими орқали амалга оширилган операциялар сони 47,6 млн. тани ташкил этди. QR-код орқали тўловлар ҳажми эса 441,7 млрд. сўмга етди.
Тадбирда контактсиз технологиялар, “Humo Pay”, “Tap-to-Phone” ва рақамли идентификация (e-KYC) имкониятлари ҳақида ҳам маълумот берилди. Шу билан бирга, HUMO ва UZCARD тизимларининг VISA, Mastercard, UnionPay каби халқаро платформалар билан интеграцияси, тўловларнинг хавфсизлиги ва киберхавфсизлик йўлидаги чора-тадбирлар муҳокама қилинди.
Медиа-мулоқотда журналистлар ва блогерлар мутахассислардан ўзларини қизиқтирган саволларга жавоблар олиб, ушбу йўналишда билимларини янада бойитди.
Ш. Маматуропова, ЎзА