Франция Маданият вазирлигида Ўзбекистон Маданият ва санъатни ривожлантириш жамғармаси раиси Гаянэ Умеровага “Санъат ва адабиёт” (Ordre des Arts et des Lettres) ордени кавалери нишонини топшириш маросими бўлиб ўтди.

Франция маданият вазири Рашида Дати Ўзбекистонда маданият соҳасини ривожлантириш борасида амалга оширилаётган ислоҳотларни эътироф этди.  Бу Франция билан стратегик шериклик муносабатини мустаҳкамлашга хизмат қилаётгани таъкидланди.

- Ушбу юксак мукофот Ўзбекистоннинг халқаро маданий алоқаларни мустаҳкамлаш ва санъат соҳасида глобал мулоқотни ривожлантиришга қўшган саъй-ҳаракатлари ва ҳиссасининг эътирофидир, - деди вазир Рашида Дати. - Ҳукумат, Президент маъмурияти ва Франция Ташқи ишлар вазирлиги, дипломатик корпус вакиллари, маданият арбоблари ва халқаро ҳамкорлар иштирокида Ўзбекистон вакилининг ушбу орден билан тақдирлангани Ўзбекистон маданий дипломатияси самарадорлигининг ёрқин далилидир.

Кейинги йилларда Ўзбекистон ва Франция ўртасидаги маданият, санъат соҳасидаги ҳамкорлик бир қатор муҳим ташаббуслар – Луврда ўзбек меросига оид кенг кўламли кўргазма, халқаро маданий анжуманларда фаол иштирок этишгача бўлган ишлар туфайли янги босқичга кўтарилди.

Шу нуқтаи назардан, давлатимиз раҳбари ташаббусларини амалга оширишда устувор лойиҳаларни амалга ошираётган Ўзбекистон маданияти ва санъатини ривожлантириш жамғармаси муҳим ўрин тутмоқда.

“Санъат ва адабиёт” ордени кавалери нишони Францияда, шунингдек, бутун дунёда санъат ва адабиётнинг гуллаб-яшнашига қўшган хизматларини тақдирлаш учун ҳар йил дунё бўйлаб 60га яқин кишига берилади.

Б.Худойбердиев,

ЎзА