Яқинда Ўзбекистон Республикаси Бош вазири ўринбосари – иқтисодиёт ва молия вазири Жамшид Қўчқоров ҳамда Япониянинг "Panasonic" корпорацияси МДҲ бўйича минтақавий директори Кожи Теражима бошчилигидаги делегация ўртасида учрашув бўлиб ўтди.

Мулоқот давомида томонлар Ўзбекистонда "яшил" иқтисодиётни ривожлантириш юзасидан амалга оширилаётган ишлар ва келгуси режалар бўйича фикр алмашди. Шунингдек, "яшил" трансформация жараёнларини қўллаб-қувватлаш ҳамда замонавий лойиҳаларни татбиқ этиш масалалари муҳокама қилинди.

Учрашувда ижтимоий объектлар ва биноларни иситишда "яшил" энергия манбаларидан фойдаланиш масаласи муҳокама қилиниб, бу борадаги имкониятлар ўрганилди. Шунингдек, биноларнинг энергия самарадорлигини ошириш, соҳада замонавий яшил технологияларни жорий этиш, жумладан, иссиқлик насослари ва энергия тежовчи технологиялардан кенг фойдаланиш бўйича таклифлар билдирилди. Ичимлик сувини тежовчи ва тозаловчи замонавий технологиялардан самарали фойдаланиш юзасидан ҳам фикр алмашилди.

Вазирлик ахборот хизматига кўра, "Panasonic Corporation" дунёдаги етакчи электроника ва технология компанияларидан бири бўлиб, истеъмолчи электроника маҳсулотлари, автомобиль компонентлари, саноат тизимлари ва яшил энергия ечимларини ишлаб чиқаради. Компания "Panasonic Green Impact" стратегияси доирасида углерод нейтраллигига эришишни мақсад қилиб, экологик тоза технологияларни ривожлантиришга катта эътибор қаратмоқда.

Музокаралар якунида томонлар ўзаро манфаатли ҳамкорлик алоқаларини мустаҳкамлаш ва соҳани янада ривожлантириш юзасидан фикр алмашиш жараёнларини кенгайтиришга келишиб олди.

Н.Зиёдуллаева тайёрлади,

ЎзА