Oliy Majlis Senatiga Belarus Respublikasining O‘zbekistondagi elchisi A.Ogorodnikov tashrif buyurdi.

Xalqaro munosabatlar, tashqi iqtisodiy aloqalar, xorijiy investitsiyalar va turizm masalalari qo‘mitasi raisi o‘rinbosari O.Mamatkarimov bilan uchrashuvda ikki davlat o‘rtasidagi savdo-iqtisodiy, madaniy-gumanitar va turizm sohalaridagi hamkorlik muhokama qilindi.  

Ikki mamlakat o‘rtasidagi yillik savdo aylanmasi 600 million AQSH dollaridan oshgani ta’kidlandi.

Belarus elchisi Minskda o‘tkazilgan birinchi Belarus -O‘zbekiston turistik forumi haqida ma’lumot berib, joriy yilda Toshkentda ikkinchi forum o‘tkazilishi rejalashtirilganini qayd etdi. Shuningdek, shu yilning 20-21 avgust kunlari Vitebsk shahrida uchinchi Belarus - O‘zbekiston ayollar forumi bo‘lib o‘tishi ma’lum qilindi.

Uchrashuvda 5-9 aprel kunlari Toshkentda Parlamentlararo ittifoqning 150-yubiley assambleyasi o‘tkazilishi va unda 190 ga yaqin davlatdan 2 mingga yaqin parlament a’zolari ishtirok etishi muhokama qilindi. Belarus delegatsiyasi mazkur tadbirda yuqori darajada qatnashishi ma’lum qilindi.  

N.Abduraimova,

O‘zA