Олий Мажлис Сенатига Беларусь Республикасининг Ўзбекистондаги элчиси А.Огородников ташриф буюрди.

Халқаро муносабатлар, ташқи иқтисодий алоқалар, хорижий инвестициялар ва туризм масалалари қўмитаси раиси ўринбосари О.Маматкаримов билан учрашувда икки давлат ўртасидаги савдо-иқтисодий, маданий-гуманитар ва туризм соҳаларидаги ҳамкорлик муҳокама қилинди.  

Икки мамлакат ўртасидаги йиллик савдо айланмаси 600 миллион АҚШ долларидан ошгани таъкидланди.

Беларусь элчиси Минскда ўтказилган биринчи Беларусь -Ўзбекистон туристик форуми ҳақида маълумот бериб, жорий йилда Тошкентда иккинчи форум ўтказилиши режалаштирилганини қайд этди. Шунингдек, шу йилнинг 20-21 август кунлари Витебск шаҳрида учинчи Беларусь - Ўзбекистон аёллар форуми бўлиб ўтиши маълум қилинди.

Учрашувда 5-9 апрель кунлари Тошкентда Парламентлараро иттифоқнинг 150-юбилей ассамблеяси ўтказилиши ва унда 190 га яқин давлатдан 2 мингга яқин парламент аъзолари иштирок этиши муҳокама қилинди. Беларусь делегацияси мазкур тадбирда юқори даражада қатнашиши маълум қилинди.  

Н.Абдураимова,

ЎзА