Тошкент шаҳрида нефть-газ соҳасидаги етакчи илмий-техник нашрлардан бири -“Ўзбекистон нефть ва газ” журнали тақдимоти бўлиб ўтди.
Журнал таҳририяти масъуллари ва кенг жамоатчилик вакиллари иштирок этган тадбирда нефть ва газ соҳасида эришилаётган ютуқлар ушбу журналнинг фаолиятида муҳим ўрин тутиши қайд этилди.
Тадбирда айтиб ўтилганидек, журнал 2024 йилдан бошлаб "Geo Research & Development Company" (GRDC) илмий-технологик маркази бошқарувига ўтказилган ва ўз ривожланишида янги босқичга қадам қўйган.
Янги таҳрирда журнал тузилмавий ва мазмун жиҳатидан тубдан янгиланиб, ребрендинг қилинди. Сўнгги ойларда журналнинг учта сони нашр этилди, шундан иккитаси 2025 йилда чоп этилган. Янгиланган нашр замонавий дизайн ва таҳлилларга бой бўлиб, у нафақат соҳа мутахассислари, балки ёш тадқиқотчилар учун ҳам муҳим ахборот манбаига айланмоқда.
1996 йилдан бери мунтазам равишда чоп этиб келинаётган “Ўзбекистон нефть ва газ” журнали нефть-газ соҳасидаги илмий янгиликлар, амалий лойиҳалар ва тармоқдаги долзарб тенденцияларни ёритиб келмоқда. У Олий аттестация комиссияси томонидан тавсия этилган илмий журналлар рўйхатига киритилган ва ҳар чоракда 3 000 нусхада республика ҳамда хорижда тарқатилади.
Журналда геология ва қидирув ишлари, углеводородлар хомашёсини қайта ишлаш, экология, рақамлаштириш, энергетиканинг келажак тенденциялари ҳамда барқарор ривожланиш мавзуларидаги таҳлиллар эълон қилинади. Шунингдек, етакчи мутахассис ва раҳбарлар билан интервьюлар, ёш олим ва муҳандисларнинг тадқиқот натижаларига ҳам ўрин берилади.
- Бугун соҳада илмий мулоқотни кучайтириш ҳар қачонгидан ҳам муҳим. “Ўзбекистон нефть ва газ” журнали профессионал ҳамжамият учун эътибор марказига, билимлар амалий қиймат касб этадиган, инновациялар эса қўллаб-қувватланадиган платформага айланмоқда, - деди таҳрир ҳайъати раиси, техника фанлари доктори Азизбек Назаров.
Маълумот учун, журнал таҳрир ҳайъати таркибига етакчи компаниялар раҳбарлари, олимлар ва халқаро экспертлар киритилган. Яқинда чоп этиладиган навбатдаги сонларда конларни ўзлаштириш технологиялари, соҳани барқарор ривожлантириш йўналишлари, энергия самарадорлиги ва глобал тенденциялар бўйича таҳлиллар чоп этилиши кутилмоқда.
Н.Зиёдуллаева, ЎзА