Жорий йилнинг 5 июнь куни Лондонда “London Design Biennale” нуфузли халқаро дизайн кўргазмаси ўз фаолиятини бошлайди.
Бу ҳақда мазкур халқаро кўргазманинг Ўзбекистон дизайни “The Once and Future Garden” (“Ўтган ва келажак боғи”) номли павильони ассистент-куратори Алсу Ахметзянова қуйидагиларни маълум қилди:
– Дарҳақиқат, “London Design Biennale” нуфузли халқаро дизайн кўргазмасининг бешинчи сони 5 июнь куни очилади ва у уч ҳафта давом этади. Унда Ўзбекистон дизайнерлари “The Once and Future Garden” (“Ўтган ва келажак боғи”) деб номланган миллий павильонини тақдим этади.
Ушбу павильонда Мадина Қосимбоева, Тигран Эрдман, Тимур Парманов, Нигора Ҳошимова каби ўзбек дизайн усталарининг ижод намуналари намойиш этилади.
Хусусан, Мадина Қосимбоева 2006 йилда “Suzani by Kasimbaeva” номли студиясига асос солган. Унинг машҳур каштачилик ишлари халқаро кўргазмаларда намойиш этилган ва Буюк Британия музейининг доимий коллекциясига киритилган. Нигора Ҳошимова эса ўз номидаги мода брендини 2013 йилда яратган бўлиб, унинг жозибали дизайнлари Москва ва Миланнинг мода кўргазмаларида ҳавола этилган. Тигран Эрдман ва Тимур Парманов эса Парижда ҳамда Миландаги нуфузли “Salone del Mobile” кўргазмаси иштирокчиси бўлган инновацион мебель дизайнерларидир.
Ўзбекистон номидан Лондон дизайн биенналесида иштирок этиш – бу бизнинг меросимизни улашиш ва мавжуд тасаввурларни қайта кўриб чиқиш учун муҳим имкониятдир. Павильон дизайни саккизбурчак шаклда яратилган бўлиб, у Темурийлар боғларининг марказида жойлашган очиқ ҳаво павильонларини эслатади.
Шунингдек, павильонда таниқли британиялик шиша рассоми Рут Шелли ҳам иштирок этади. Шелли 2023 йилда Ўзбекистоннинг Марғилон шаҳрига саёҳат қилиб, бутун мамлакат бўйлаб ҳунармандлар билан учрашган. Ушбу ташриф унга ўзбек иккат (атлас) нақшларидан илҳомланиб, шиша идишлар коллекциясини яратишга ундади. Бу ўзбек дизайн мотивлари халқаро санъаткорлар ижодига қандай таъсир қилаётганининг ёрқин намунасидир.
Биеннале Лондондаги тарихий “Somerset House” йирик маданий марказда бўлиб ўтади. Унда 40 дан ортиқ павильон ташкил этилади. Уларда Ўзбекистон қаторида Аргентина, Озарбайжон, Чили, Польша, Саудия Арабистони, Туркия каби мамлакатларнинг таниқли дизайнерлари ўз имкониятларини намойиш этади.
Н.Зиёдуллаева, ЎзА