Бугунги кунда юртимизда спортнинг Каратэ WKF тури жадал оммалашмоқда. Президентимизнинг 2023 йил 3 ноябрь куни қабул қилинган "Каратэ (WKF) спорт турини янада ривожлантириш чора-тадбирлари тўғрисида"ги қарори ўзбек каратэсида янги даврни бошлаб берди.

Ушбу қарорга мувофиқ, каратэ WKF бўйича юқори малакали профессионал спортчилар, тренерлар, тренер-селекционерлар, ҳакамлар ва бошқа мутахассисларни илғор хорижий тажриба асосида тайёрлаш мақсадида Ўзбекистон каратэ WKF ассоциацияси томонидан қатор ишлар амалга оширилмоқда.

Мамлакатимизнинг турли ҳудудларида тренер ҳамда ҳакамлар учун ўқув-семинарлари ташкил этилмоқда.

Аниқроқ айтадиган бўлсак, ушбу семинар тўрт ҳудуд кесимида ўтказилади. Жумладан, 1-ҳудудда Қорақалпоғистон Республикаси, Хоразм ва Бухоро вилояти, 2-ҳудудда Самарқанд, Навоий, Қашқадарё ва Сурхондарё вилояти, 3-ҳудудда Фарғона, Андижон ҳамда Наманган, 4-ҳудудда Тошкент шаҳри, Тошкент, Сирдарё, Жиззах вилоятларидан келган тренер, ҳакам ва мутахассислар иштирок этади.

Семинар давомида иштирокчилар 5 йўналиш бўйича салоҳиятларини янада юксалтириш билан бирга, мазкур спорт турининг янги қоидаларидан бохабар бўлади. Бундан ташқари каратэчиларнинг маҳоратини янада ошириш борасидаги билимлари оширилади.

Н.Раҳмонова, ЎзА