Жиззах вилоятининг туманларидан бирида Фавқулодда вазиятлар бўлими бошлиғи пора билан қўлга олинди. Давлат хавфсизлик хизмати маълумотларига кўра, мансабдор шахс икки ҳолатда тадбиркордан ноқонуний равишда пул талаб қилган ва олган.

Маълум бўлишича, жорий йилнинг сентябрь ойида у маҳаллий тадбиркор қуришни режалаштирган кўп қаватли уйнинг лойиҳа ҳужжатларини тасдиқлаб бериш эвазига 200 доллар олган. Кейинроқ эса шу тадбиркор қуришни режалаштирган хусусий мактаб лойиҳасини тасдиқлаш учун 6 миллион сўм талаб қилган.

Тегишли органлар ўтказган тезкор тадбирда туман ФВБ бошлиғи пора маблағини турмуш ўртоғи орқали қабул қилаётганда ушланган. Унга нисбатан Жиноят кодексининг 210-моддаси 2-қисми “а” ва “в” бандлари билан жиноят иши қўзғатилиб, қамоқ эҳтиёт чораси қўлланди.  

А. Қаюмов, ЎзА мухбири