Пойтахтимиздаги “Universal horses stable” от спорти клубида конкур бўйича “CSI1-W” Жаҳон кубогининг биринчи босқич баҳслари якунланди.

Ушбу нуфузли мусобақада мамлакатимиз шарафини ҳимоя қилган Бекзод Қурбонов 3 та йўналишда ғолиб бўлган ҳолда ўзбек чавандозларининг маҳоратини дунёга намоён этди. 

Аниқроқ айтадиган бўлсак, Б.Қурбонов дастлаб “CSI1-W” мусобақасининг “Competition 5” йўналишида 130 см. тўсиқлардан от сакратишда “Santos Hippica” номли тулпори билан олтин медалга эга чиқди. 

Шунингдек, “Grand Prix” ва “Eurasia League” (Maxima Masters Eurasia cup) финал босқичида 160 см. баландликдаги тўсиқларда ўтган беллашувларда “Matts V.G” лақабли оти билан тенгсиз эканини исботлади. 

Дарвоқе, “Eurasia League” мусобақасида яна бир ҳамюртимиз Хуршидбек Алимжонов “Champions League” тулпори билан бронза медалини қўлга киритди. 

Жавоҳир Тошхўжаев, ЎзА