Жорий йилнинг 31 июль кунидан 11 август кунига қадар Таиланднинг Бангкок шаҳрида бокс бўйича U22 ва U19 ёшгача бўлган боксчилар ўртасидаги Осиё чемпионатида Ўзбекистон терма жамоаси ҳар икки ёш тоифасида муваффақиятли иштирок этиб, юртимизга ёруғ юз билан қайтиб келди.

Музаффар боксчиларимизни Тошкент халқаро аэропортида спортимиз мутасаддилари, мамлакатимиз бокс федерацияси ходимлари, спортчи ва мураббийларимизнинг оила аъзолари ҳамда ОАВ вакиллари тантанали кутиб олди.

Шуни таъкидлаб ўтишимиз лозимки,  Осиёнинг 25 та давлатидан 367 нафар боксчи иштирок этган Осиё чемпионатининг U19 ёш тоифасидаги беллашувларда Ўзбекистон терма жамоаси 7 та олтин, 3 тадан кумуш ва бронза медалига эга чиққан ҳолда қитъамизда тенгсиз эканини исботлади. Умумжамоа ҳисобида вакилларимиздан кейинги ўринларда Ҳиндистон 3 та олтин, 7 та кумуш, 4 та бронза медал жамғариб, 2-поғонадан жой олган бўлса, Хитой термаси 3 та олтин, 1 та кумуш ва 5 та бронза медали билан кучли учликни якунлаб берди.

Қитъа биринчилигининг U22 ёш тоифасида эса чарм қўлқоп усталаримиз 8 та олтин, 6 та кумуш ва 4 та бронза медалини қўлга киритиб, умумжамоа ҳисобида яққол пешқадамга айланди. Медаль тўплашда Қозоғистон терма жамоаси 5 та олтин, 4 та кумуш билан иккинчи, мезбонлар эса 3 тадан олтин ва бронзага эга чиқиб, учинчи ўриндан жой олди.

Ушбу чемпионатдаги ёш боксчиларимизнинг улкан муваффақиятлари мамлакатимизда мазкур спорт турини янада оммалаштириш борасида олиб борилаётган тизимли ишлар натижасидир.

Дарҳақиқат, сўнгги йилларда мамлакатимизда бокс спорт турини янада ривожлантиришга қаратилаётган доимий эътибор самарасида спортчиларимиз халқаро майдонларда юксак марраларни забт этмоқда. Хусусан, бугунги кунда ўзбек бокс мактаби тарбияланувчилари спорт оламининг барча нуфузли мусобақалари – Олимпия ва Осиё ўйинлари, жаҳон ва қитъа чемпионатларида юқори натижаларни эгалламоқда.

Умид қиламизки, бундай ғалабалар бардавом бўлади.

<iframe width="640" height="420" src="https://www.youtube.com/embed/I5eiDhFe14o" title="Osiyoda tengsiz bo‘lgan bokschilarimiz tantanali kutib olindi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Жавоҳир Тошхўжаев,

Тўлқин Рўзиев, Дониёр Якубов (видео), ЎзА